State pawn mi thangkhang 940 an awm mek

Ministry of Home Affairs duhdan angin Mizoram chhunga State pawn mi hnathawka tangkhangte tan chenna tur leh eitur ruahman a ni.

Hemi chungchanga Home Minister, Lalchamliana sawi danin State pawn lam mi, Mizoram-a hnathawka awmte chungchang hi an tangkhanna theuh District Task Force kuta dah a ni a. Chutianga lo buaipui tur chuan Home Department chuan District tinte a hriattir tawh a ni. Sawrkar laipuiin a sawi lawk angin hetiang ho chenna tur leh eitur buaipuina senso hi Mizoram sawrkar chuan a lo tum rih phawt anga, State Disaster Response Fund (SDRF) atanga la pek leh tur a ni ang. Tuna hriat theih chinah chuan nimin thlenga Aizawl District-a hnamdang hnathawk tangkhang mek chu mi 136 an awm a. Kolasib District-ah 697, Serchhip District-ah 47 leh Mamit leh Hnahthial District-ah 30 ve ve an tangkhang mek a, tuna tangkhang hi an vaiin 940 an ni.

Sawrkar laipui duhdan angah chuan kawngpui National Highway dungah hetianga state pawn mi tangkhangte hi tawmhulna tur siam sak a, eitur pe bawk turin state sawrkar a hriattir a. Mizoram-ah chuan sawrkar laipuiin kaihhruaina a rawn siam hma hian khaw thenkhatah mi thahnemngai te’n ei tur siam sakin a thlawnin an lo pe tawh thin a ni.