Serchhip District chhungah Ration buhfai a tam tawk

Serchhip-a Supply Department hotute chuan tun dinhmunah Serchhip District chhungah mipuite tan Ration buhfai a tam tawk tih sawiin, mipuite tan buhfai-ah hlauhthawn tur a awmlo tih an sawi.

Tunhnai-ah Coronavirus chungchang avanga Mizoram sawrkar in ramri-a inkal-pawhna te a khuahkhirh lehzual avanga mi tam takin Buhfai leh eitur dang an chhekkhawl chung-changah nimin khan kan Palai chuan Serchhip-a Supply Department hotu thenkhat te kawmin sawrkar in mipuite tana Ration buhfai a pek-chhuah dinhmun a zawtfiah a. Supply Department hotute chuan tun dinhmun ah Serchhip District chhunga Supply Department Kudam hrang hrangah buhfai a tam tawk tih sawiin, hmun thenkhat ah phei chuan Fur ruahtui tlak hunah pawh harsatna thlenglo turin kumin kumtawp lam thleng daih tur Ration Buhfai hi chhekkhawl a nih tawh thu an sawi.

Serchhip District-a Supply Department Kudam lian ber, Serchhip-ah pawh tun dinhmun ah Buhfai hi a tam tawk tih sawiin, nimin khan March thla quota tur pekchhuah kim niin heti chung hian thla hnih (2) daih quota aia tam daih Kudam-ah hian ala awm tih an sawi a. Hei bakah hian Kudam lian zawk atanga Buhfai rawn phurh chhoh leh mai tur pawh a awm thu sawiin, heng te pawh hi reilote a rawn thleng leh mai tur a nih avangin mipuite tan buhfai-ah hian thlaphanna tur a awmlo tih an sawi a ni.

Hetihlai hian Mizofed Serchhip Branch pawhin Mizoram chak lakluhna kawngah har-satna an la tawklo tih sawiin, eirawngbawlna Gas pawh dan pangngaia a rawn thlen reng thu leh mipuite tan lo chi-ai na tur a awmloh thu an sawi a. Nimin khan Gas hi trip khat rawn thlengin kawng laka rawn thang mek a awm thu an sawi bawk. Hetihlai vek hian Serchhip-a bungrua rawn phurluttute chuan Vairengte Check Gate-ah har-satna liantham an tawhloh thu an sawi bawk.