Supply Minister in hlan

Supply Minister, K. Lalrinliana chuan nimin khan District Hospital, Kolasib-a hman tur bung-rua leh thil chi hrang hrang thahnem tak a hlan.

Nimin a Supply Minister in District Hospital, Kolasib-a hman tur a hlan te hi Personal Protection Equipment (PPE) 150, N95 Mask 150, Shoe Cover 150, Three Layer Mask 400 leh Covid-19 chungchanga hriattur inziahna leaflet te a ni a, Minister hian Covid-19 hri darh zel tur veng a duty te tlawh kualin, Kolasib Assembly Constituency chhunga Village Level Task Force 17 te hnenah a tul apianga hman tur Rs. 10,000/- theuh leh Hand Sanitizer engemaw zat a pe nghal bawk.

Supply Minister hian Bairabi Rail Station-a Labour Association Office tlawhin, hun harsa tak kara buhfai thiar thintute chungah lawmthu a sawi a, harsatna an thlen te chu a ngaihtuahpui tur thu sawiin, an hman tur Mask leh Hand Sanitizer a pe nghal bawk a ni. 

Minister hian Bairabi FCI-a thawktute kawmin, tunah hian buhfai wagon 42 awm mekin wagon 29 lo thleng leh mai tur a awm thu an lo hrilh a. Buhfai hi Wagon atanga Truck a an hlanchhawn zung zung loh chuan darkar 7 a pelh atangin darkar tin Wagon pakhat zelah Rs. 150/- an chawi a ngaih thin thu labour ten lo thlenin, hemi avang hian buhfai lo thleng tur te thiar tur hian motor 300 vel a ngaih dawn thu an thlen bawk a. Minister chuan heng buhfai te hi a rang thei ang ber a thiar zung zung a nih theih nan Truck Owner Association te, Driver te leh mimal truck nei zawng zawng te pawh Mizoram mipui ten harsatna kan tawh loh nan a thei apiang thawhchhuah a tul thu a sawi a. FCI buhfai thiarna labour rate Rs. 1.36 a thawktu duh ang zat hmuh a nih loh avangin a mimal sum atangin bag tin ah Rs. 2/- zel a pek belh mek bawk a ni. 

Supply Minister hian Bairabi Primary Health Centre-a a tul ang a hman tur PPE, Mask leh Sanitizer a hlan nghal bawk.