Partial Lock-Down chhunga kawlphetha khaihlak loh nan hmalak zel a ni

COVID-19 avanga Mizoram pumpui Partial lock-down a nih chhungin Mizoram in chatlak lova kawlphetha a mamawh ang zat a neih reng theihna turin Power & Electricity Department chuan theihtawp a chhuah dawn a ni tih Department enkawltu Minister, R. Lalzirliana’n a sawi.

He thu hi nimin-a P&E Department hotuliante nen COVID-19 vanga Mizoram in harsatna a tawh loh nana an hmalakna tur an sawihona ah P&E Minister chuan a sawi a, Minister chuan P&E Department chu Mizoram leh mipui mamawh kawlphetha chatlak lova kan hmuh theihna tura hmalatu an ni avangin Partial lock down chhung pawh hian nitin hnathawka chhuak lo theilo an nih thu a sawi a, a tul dan ang angin an Department hnuaia Office hrang hrangte pawh hawn a ni a, staff duty dan tur pawh mipuiten harsatna an tawh loh nan staff duty dan tur pawh mumal taka siam a ni tih mipuiten hriatpui se a duh thu a sawi a ni.

Mipuite pawn chhuah khap a nih avangin Electric Bill pekna Counter te chu khar a ni a, Aizawl, Lunglei, Siaha, Champhai, Serchhip, Khawzawl, Saitual leh Kolasib bakah internet service thatna hmun a awmte chuan online a electric bill pe mai turin ngen an ni a. Boruak tawn lai mekin a zirloh em avangin consumer te energy meter reading la turin staff intirhchhuah a ni lova, hei vang hian electric bill tum danga tihchhuah thin dan angin a kalpui theih dawn lova, heivang hian tunhma a late fee chawi tir thin kha tun tum atan chuan inngaihnathiam an ni dawn a ni. COVID-19 laka kan fihlim hun tur hriat a nih loh avangin electric bill hi a hlawmin an pek a ngai dawn a, thla thum bill emaw, a aia tam emaw pawh boruak dinhmun azirin a nih a ngai dawn a, electric bill an dawn hunah lo hrethiam turin consumer-te an ngen lawk a ni.

Sawrkarin Mizoram chhung hmun hrang hrangah Quarantine Centre leh Isolation Centre a siam a, heng Centre hrang hrangah te hian kawlphetha lakluh an mamawh anih chuan tanpui tura che chhuak turin P&E department chu a inpeih reng a ni tih Minister chuan an sawi a. P&E department staff zawng zawngte thingtlanga awmte pawh an hnathawhna hmun, anmahni Station-ah awm a, a tul huna koh theih a awm turin an inhriattir vek a. Sub-Station, Complaint duty-na, Control Room leh WT Station zawng zawngah duty an indah vek a, consumer-te hnen atanga complain lut te a theih ang anga chinfel an tum rualin complain lut zawng zawng an tihhlawhtlin vek theihlloh palh pawha hrethiam turin consumer te leh mipuite an ngen a ni.

Heng bakah hian PHE department-in mipui hnena chatlak lova tui mamawh an pek reng theih nan Pump House-te mamawh zat kawlphetha pek reng a ni a, damdawi In leh sawrkar hmun pawimawh zawng zawngte pawhin harsatna an tawh loh nan theihtawp an chhuah tih P&E department hotute hian an sawi a ni.

P&E department hotute chuan state pawn atanga Mizoram mamawh zat power supply lakluh chungchangah harsatna a awmlo tih sawiin, Mizoram in harsatna a tawh loh nan theihtawp an chhuah reng thu an sawi bakah mipuite thlamuang taka awm turin an chah a. Kawlphetha a Mizoram kan intodelh nan Mizoram sawrkarin theihtawp a chhuah reng tih pawh sawiin, cheng vbc. 465 man kawlphetha megawatt 24 pechhuak thei tur Tuirini Small Hydro Project pawh bul tan thuai a nih theih nan sawrkarin theihtawp a chhuak mek a ni tih an sawi a, he project hi Mizoram tana pawimawh tak, kawlphetha lama kan intodelhna atana hmanraw tangkai tak tur a nih thu an sawi bawk.