Council of Minister thukhawmin in COVID-19 chungchanga hmalakna hrang hrang an thlirho

Nimin khan Chief Minister Office Cabinet Meeting Room-ah Chief Minister, Zoramthanga kaihhruaiin Council of Ministers thukhawmin Covid-19 chungchanga sawrkar hmalakna hrang hrang te thlirhovin, hmalak belh ngaite an sawiho.

He Meeting hi Chief Minister, Zoramthanga chuan kaihruaiin sawrkarin mipui him tlanna turin COVID-19 kaihhnawihah a tul ang zelin sum leh pai mamawh ruahman a ni tih a sawi a. Health Minister Dr. R.Lalthangliana chuan Testing Kit chu buaipui chhung a rei thin avangin neih nghal mai theih ni lo mah se theihtawp chhuah mek a ni, a ti a. Khawsik enna (thermal scanner) pawh chah belh niin, market-ah lei tur a tlem tawh chungin tun dinhmuna indaihlohna phuhru thei tur khawp chu chah a nih thu a sawi bawk.

Mipui him tlanna tur atana sawrkarin zirna In a khar hnuah chawlh satliah emaw tia pawna chhuak vak tam tak an la awm tih hriat a nih thu pawh he hunah hian tarlan niin, hei hi khawtlang hriselna atana thil pawi tak thlen thei a nih avangin chakkhai lam tur leh thil tul bikah lo chuan mahni In-a awm tam tura inhrilhhriat nawn leh kan mamawh hle tih an sawi a. Sawrkar hmun thenkhat, tlawhtu nei tam deuhte chu mipui him tlan zawk nan khar a ni tawh a, nimin a Council of Ministers thukhawm chuan Mizoram State Museum pawh khar tel ve ni se an ti a ni. 

Meeting-ah hian ramri hrang hrang khar rih a nih dan te sawiin, heng border-a endikna kalpui a nih dan te sawiho a ni a. Bangladesh nena inrina pawh khar a nih tawh thu an sawi a. Border-a screening titu ten hmanrua an mamawh te pek belh a tul thu pawh sawiin, Thermal Scanner pek belh bakah felfai leh chak zawka Data Recording tih theih nan Laptop ruahman sak te, a remchan dan anga a nghet lova thawktu (Temporary Employee) lak belh te an rel a, tlawmngai pawl te nena tan tlan a tul thu sawi a ni bawk a. Sawrkar office hrang hrangah kutsilna siam a ni chu lawmawm tiin, thawktute pawh fimkhur tlang zel turin an chah bawk.

Tun dinhmunah Zokhawthar leh Lengpui Tourist Lodge chu Isolation Facility atan buatsaih a ni tawh a. State leh District Level-ah Task Force din tawh a ni a. Local Council/Village Council kaihhruaina hnuaiah Veng/khaw tina NGO leh Kohhrante telna Local/Village Level Task Force din tur niin hmun tam takah chuan din a ni tawh bawk.