Health Minister in mipuite hnenah ngenna siam

Health Minister Dr. R. Lalthangliana chuan khawvel hmun hrang hranga natna hri leng mek, Covid-19 chungchangah thuthang diklo vawrhdarh lo tur leh a thalo zawnga mipui hruai kawi thei thu thehdarh lo turin mipuite a ngen a, Principal Director, Health Services atanga chhuak anih loh chuan he natna chungchanga thuchhuak reng reng thu tlinga ngai lo turin mipuite a chah bawk.

Nimin a thuchah a tihchhuah ah Health Minister chuan he natna in Mizoram alo luh loh nan theihtawpin sawrkar a inruahman tih a sawi a. Fimkhur thu ah sawrkar chuan Mizoram leh ramdang inrina, International border a khar rih a, hei bakah hian state dang nena kan inrina hrang hrang ah entry point siamin, Mizoram lo lut tur te uluk taka enfiah an ni a, heng hmun atang chauh hian state chhung luh phal a ni a. Ramri lama inkalpawhna khar anih lai hian mipui chakkhai lakluh kawngah erawh harsatna a awm lo tih sawiin, heng state dang atanga chakkhai phurtute leh ei leh bar atana pawimawh bikte chu uluk taka enfiah an nih hnu ah ILP pek an ni chauh dawn a, India khua leh tui nilo te erawh Mizoram luh phal an ni dawn rih lo tih a sawi bawk.

Health Minister chuan mipuite chu kut fai taka sil ngun tur leh tul bik thil ah lo chuan zin chhuak rihlo turin a chah nawn a, sawrkar hmalakna te theihtawp a thlawp a, kohhran leh tlawmngai pawl te nen lungrual taka tanho chuan he natna hian kan ram a lo luh a rin loh thu a sawi a, mipuite chu chi-ai lo a, sawrkar thuchhuak chauh ring turin a chah a ni.

Task Force hmalakna in Police te, Supply Department te leh FDA te nen tangkawpin thil man leh supply dinhmun thlithlai reng a ni dawn tih pawh Health Minister chuan sawiin, ‘Sem sem dam dam, eibil thi thi’ tih chawi nung zel turin mipuite chu a ngen bawk.