Mizoram Governor in Khawzawl tlawhin Sawrkar Department hotute nen an inkawm

Mizoram Governor, PS. Sreedharan Pillai chuan nimin khan Khawzawl a tlawh a. Governor lawmna puala inkhawm hi Krishi Vigyan Kendra (KVK) Khawzawl hmunah buatsaih niin sawrkar mi pawimawhte leh khawtlang hruaitute a kawm nghal bawk.

Nimin-a Khawzawl tlawhtu Governor lawmna puala inkhawm, KVK Meeting Hall-a buatsaih ah Governor, P.S. Sreedharan Pillai chuan Khawzawl mipuite nen Vantlang inkhawm neih a chak thu leh hri leng avanga neih theih a ni ta lo erawh pawi a tih thu a sawi a. Mizoram-a District 11 te erawh March thla chhunga tlawhchhuah ala tum thu sawiin, District tam zawk chu a tlawhchhuah tawh thu te pawh a sawi a. Governor chuan District hmasawnna te, thingtlang khaw lama hmasawnna te chu ram hmasawnna atana pawimawh a nih avangin Sawrkar in State Capital a ngaih pawimawh ang thovin thingtlang mite hmasawnna a ngai pawimawh a ni, a ti.

Khawzawl DC, H. Lianzela kaihhruai he hunah hian Governor chuan Mizoram-ah sawrkar hmalakna hnuaiah hmasawnna a awm mek zel tih a sawiin, Mizo mipuiten tan an lak a, sawrkar hmalakna an thlawp that phawt chuan India rama State hmasawn ber kan ni thei tih a sawi a. Ziak leh chhiar thiam tamna ah pawh Kerela khumin pakhatna nih kan tum tur tih sawiin, “Faina kawngah entawn tlak kan niin ka hria; District Hospital tam tak ka tlawh tawh atangin hei hi ka chiang a. Mizoram-a Hospital te hi India ramah Hospital fai ber an niin ka hria,” a ti a. State in Financial Resources nei tlem deuh mahse haichhuah tur tam tak kan nei tih pawh sawiin, “India hmarchhak a cheng mipuite hi India ram pumpuia mipui zawng zawng belhkhawm zinga 3% chauh an ni a. Mahse, India in hmarchhak state te hman tur 10% lai Budget-ah a dah a. Hengte hi tangkai taka haichhuah leh hmasawnna atana hman kan tum a ngai a ni,” a ti bawk.

Governor lawmna puala inkhawm neih zawh a nih hnu hian Governor hian Addl. DC, Paul L. Khuma kaihhruaina hnuaiah Kohhran Hruaitute, Village Council hruaitute, Political Party aiawhte, Khawtlang Hruaitute, Tlawmngai Pawl te leh District Official te a mal te te in a kawm leh bawk a. Sawrkar hnathawk te a kawmna ah hian Khawzawl DC, H. Lianzela chuan an District dinhmun leh hmasawnna te a lem en entirin P.C. Lalchunglura, SP chuan an District chhunga Dan leh thupek kenkawh chungchanga an hmalakna te a lem nen a entir bawk a ni.