VC inthlanpui neih tur atana inbuatsaihna atan Electoral Roll enfiah hna thawh tan a ni

Mizoram-a Village Council inthlanpui nei turin inbuatsaihna kalpui mek a ni a. He inthlanna atana hman tur Electoral Roll enfiah hna chu nimin khan thawh tan niin nimin khan Draft Electoral Roll chu tarchhuah a ni a, March 31, 2020 khian Final Electoral Roll tarchhuah leh tura ruahman a ni.

Mizoram District 9-a Village Council dinglai te Term chu April 30, 2020-ah a tawp dawn tak avangin Village Council inthlanna nei tur hian Mizoram State Election Commission chuan hma a la mek a. He inthlanna atana hman tur Electoral Roll enfiah hna chu nimin khan thawk tanin Draft Electoral Roll chu tarchhuah a ni a, Serchhip District chhung Village Council hrang hrang tana Draft Electoral Roll pawh nimin khan Serchhip District Election Officer, H. Dolianbuaia chuan a Pisa-ah tlangzarhin he hunah hian District Election Officer chuan VC inthlanna neih turah hian Serchhip District-ah VC 54 awm tura ruahman mek a ni tih sawiin, tuna Electoral Roll neih lai chu Draft Electoral Roll-ah hman a nih thu leh VC inthlanna ah hian Non-Tribal ten Vote an neih theih dawn loh avangin Electoral Roll atanga Tribal te paih chu hna pawimawh ber a ni dawn tih a sawi a. Electoral Roll enfiah hna thawh turah hian AERO te chu an bial-a VC tinah kalchhuak vek tura tih ni mah se Electoral Roll enfiah chhung a rei dawn loh avang leh March 31-ah Final Electoral Roll tarchhuah a tul dawn avangin NGO leh Village Level Officer (VLO) te bakah mipuite tanrual a tul dawn tih sawiin, Serchhip District chhunga VC hrang hrangte tana Electoral Roll duanchhin chu a tlangzarh nghal a ni.
He hunah hian Serchhip Election Officer, Vanlalhmachhuana chuan Electoral Roll enfiah hna thawh dan tur tlangpui sawiin, tun tuma Electoral Roll siamthar turah hian kumin Jauary 1-a kum 18 tling chin te thun theih a nih dawn thu sawiin, March 13, 2020-a Draft Electoral Roll tar-chhuah a nih atanga March 18, 2020 chhung hian hming thun thar, siamthat leh paih ngaite tan dilna hun hawn nghal a nih dawn thu a sawi a, heng dilna te hi March 19-25, 2020 chhunga enfiahin March 26 atangin Final Electoral Roll chu chhut a nih dawn thu leh March 31-ah Final Electoral Roll chu tarchhuah a nih dawn thu a sawi bawk.
Election Officer chuan heng dilna hrang hrang thehlut tur hian Form siamsa hman a nih dawn thu pawh sawiin, VC Electoral Roll chu VC thlanna atan chiah hman tur, Document dang-a hman theihloh a nih avangin Voters te anmahni an ni tih tichiang thei tur a awm chuan hming ziak dan lo chhut felfai lo deuh a awm a nih pawhin harsatna lutuk awmlo tura ngaih a nih thu a sawi a. Mipui ten an awm duhna VC ngei-ah Vote an neih theihna turin tuna Electoral Roll ennawn chhung hian mipuite chuan Vote an neihna VC enfiahin an ngaihven a pawimawh thu a sawi bawk.
Nimin-a Draft Electoral Roll tar-chhuahna hunah hian Serchhip District chhunga ERO leh AERO bakah tlawmngai pawl leh Political Party hrang hrang aiawhte telin YMA Sub-Hqrs. Serchhip leh Political Party hrang hrangte hnenah hian Draft Electoral Roll hi siamchhuah nghal a ni bawk.

Comments

Chhiar Hlawhte