Mizoram Governor te nupa in lehlangin Champhai District an tlawh

Mizoram Governor, PS. Shreedharan Pillai leh a nupui, Governor Reetha Sreedharan te chuan nimin khan lehlangin Champhai an tlawh a. Governor hmuahna leh inkawmhona chu Champhai Circuit House Conference Hall-ah buatsaih a ni.
Champhai tlawhtu Governor leh a nupui lawmna hunah hian Governor, PS. Shreedharan Pillai chuan Champhai tlawh theia awm leh an lo dawnsawnna ah lawmthu a sawi a. Mizoram Chief Minister hnen atangin Champhai leh a chhehvel chungchang engemaw chen a lo hriat tawh thu sawiin, Mizote tunhma nun dan phung, Rih Dil leh rin dan thlenga a hriat thin thu leh zirlai ang maia hriat belh tuma inzir zel a nih thu a sawi a. Mizoram chu ram nuam tak, a mi chengte pawh thinlung thianghlim tak pu mi ni-a a hriat thu leh khawtlang anga lungrual taka khawsakhona leh sawrkar tawiawm tlat thinna te chu a fak a. Mizoram Governor chuan District hrang hrangte a tahtawla tlawhchhuah vek a tum thu sawiin, Mizo tawng chawinun zel kawngah tanlak angaih thu a sawi bawk.
Governor chuan mipui thlan ram hruaitu leh sawrkar hnathawkte chu an mawhphurhna hlena, mipuite rawngbawl kawngah thahnemngai taka thawk zel turin a chah a. Mipuite zinga hun tam thei ang ber hmanga an harsatna leh mamawhte hriatpui thei tura fuihin, khua leh tui, a te ber thlenga an nitin nuna mamawh ang tura tuk chin tal an dawn chu zalenna tluantling a ni, a ti a. India rama cheng za zela 26% te chuan mamawh ang tura bithliah hniam ber pawh an la dawng theilo tih pawh sawiin, Sawrkar laipuiin North East State hmasawnna a ngaihpawimawh thu pawh a sawi a, India ram mipui vbc. 134 atanga za zela 3.5 awmna North Eastern States tan Budget atangin za zela 10 vel a dahsak thu a tarlang bawk.
Champhai Circuit House-a Governor lo lawmna leh inkawmhona hun buatsaih hi Champhai District Bawrhsap, SL. Naveen, IAS chuan a kaihruai a. Champhai District dinhmun tlangpui tarlangin, Sawrkar Department hrang hrangte hlawhtlinna tlanglawn a lem nen entirin a sawifiah a. Coronavirus Disease chungchanga District hmalakna tarlangin, Medical Screening leh inkalpawhna chungchangah khuahkhirhna felfai tak kalpui anih thu a sawi a. Khawtlang hruaitu, NGO-te tawiawmnaah lawmthu a sawi bawk a. Champhai SP, Rex Zarzoliana pawhin Champhai Police dinhmun tlangpui leh hlawhtlinna te a lem nen entirin a sawifiah bawk.
Hemi hnu hian Governor hian Kohhran hruaitute, NGO hotute a hrangin a kawm a. Chawhnu lamah Mazuia Memorial Home (TNT) tlawhin Governor chuan mahni mihringpuite rawngbawl sak hna chu Pathian rawngbawlna dik tak anih thu a sawi a. A thil hmuh leh hriat chuan chona leh phurna thar a pek thu sawiin, Pathian awmzia lantirtu a ni, a ti a. Tanpuina thilpek pe in an kal zelna turah duhsakna a hlan bawk.

Comments

Chhiar Hlawhte