Coronavirus chungchanga inbuatsaihna thlirin Health Minister in ZMC a tlawh

Health Minister, Dr. R. Lalthangliana chuan niminpiah khan Falkawn-a Zoram Medical College (ZMC) chu tlawhin Covid-19 laka inralrinna leh inven lawkna tura hmalakna hrang hrangte a enpui.

Niminpiah a Zoram Medical College (ZMC) a tlawhna ah hian Health Minister, Dr. R. Lalthangliana chuan khawvel ti ralkheltu Covid-19 lakah hian ralkhel dar kan vaw tawh tih sawiin, hetiang hripui hi Mizoram in tawng ve thut thei kan nih avangin thil tul leh mamawh awm ang angte chu kan inbuatsaih lawk a ngai a ni, a ti a. Covid-19 doletna tur hian NGO hrang hrang te, Kohhran hrang hrang leh sawrkar thawhhona ah an tangrual tha chu lawmawm a tih thu a sawi a, “Kohhran hrang hrangah pawh lehkha ka thawn chhuak vek tawh a, theihtawp chhuaha min tawiawmna ah lawmawm ka ti a, ropui ka ti hle a ni. A hun taka kan lungrual thei leh thawhhona tha kan neih theihna hian Mizo nih pawh a tinuam hle a ni,” a ti.

Zoram Medical College (ZMC)-ah hian Covid-19 in Mizoram a rawn thlen thut pawha hman theih turin DRTB Isolation Ward-ah khum 30 ruahman lawk a ni a, he natna vei enkawl dam tawh si, In lama haw la phal si lohte tan khum 7 dah lawk a ni bawk a. Room-te pawh Virus chhuah lohna tura siam vek a ni a, Khuh leh Thawhah enkawlna turin Ventilator lam pawh an nei tha tawk bawk a. Doctor leh Nurse te, damlote luhna leh chhuahna tur a hran veka siam a ni. Hei bakah hian ICU-ah khum 7 hman mek a ni bawk a, Private Hospital-te tibuai lo turin an inralring a ni.

He hri vei nia rinhlelh te endikna khawl hi cheng nuai 100 man bawr vel niin, Installation neuh neuhah cheng nuai 100 bawr vel zet sen ngai tur a ni a, hei hi lei tura beisei niin he natna vei nia rinhlelh te chu ni 15 chhung enkawlna tur bikah khung hran an ni ang a, an ei leh in pawh sawrkarin a thlawnin a tum sak vek dawn a ni.