Health Minister in ramri hnaih a COVID-19 Screening neihna hmun a tlawh

Health Minister, Dr. R. Lalthangliana chuan nimin khan Vairengte leh Barabi-a Covid 19 Check Post, Screening kalpui mek chu tlawhin, thawktute dinhmun a enfiah a, helai hmuna thawktu awm ten an mamawh Thermal Scanner leh Hand Sanitizer engemaw zat a pe nghal bawk.
Health Minister, Dr. R. Lalthangliana hian Vairengte-a Covid 19 Check Post hi tlawh hmasa in Vairengte chu kan ei leh bar lo luhna ber anih avangin, hmundang ai pawhin Duty a hautak tih a sawi a. Duty-te inpekna ah lawmthu sawiin, “Eng chen nge kan la tih dawn hriat a ni lova. Medical lam leh NGO-te lo inrawn zel u la. Tuna buai leh mangan laia in mamawh, thawktu indaihlohna hi Medical lam thiam pali nga vel Daily-in lo la nghal u la, hlawh chu kan pe mai ang,” a ti a. Hei bakah hian Vehicle-a an indaihlohna pawh hire tur lo la nghal tura tiin, Traffic Management lam atan IR 10 vel an mamawh pawh a lo sawi nghal tur thu sawiin, “Ramri-a kan invenna hmun hrang hrangah kan thawhhona a tha a, Mizo nih a nuam hle a ni,” a ti a. Helai hmuna thawktute thingpui in na turin Rs.10,000/- a pe bawk.
Hemi hnu hian Health Minister hian Bairabi-a Covid 19 Check Post tlawh lehin, thawktute hna thawhna hmun ngeiah tlawhin an mamawh te pawh hriatchian theih a nih thu sawiin, “Tuna thawktu in indaihlohnaah hian Bairabi khua ngei Nurse emaw, Health Worker emaw ni khata Rs. 500/- vel hlawh tur pahnih khat chu NGO-te nen inrawn tlangin lo lak belh mai u la. Inthiarna leh Tuizem in mamawhte pawh pek nghal in ni ang,” a ti a. Covid 19 vei nia rinhlelh te Test result pawh a tukah kan hre nghal zel tih sawiin, “Kan la fihlim vek hi Pathian hnenah pawh lawmthu kan sawi a ni,” a ti a. Duty-te thingpui in nan Rs.5000/- a pe nghal bawk.

Comments

Chhiar Hlawhte