Mizoram Police in mipuite chungah lawmthu an sawi

Mizoram Police-a Inspection General of Police (Law and Order/Arms), LH. Shanliana chuan inkharkhip mekah fak tlaka dan leh thupek tha taka Mizoram-ah kenkawh a nih theihna chhan chu mipuiten an mawhphurhna tha taka an lak vang a ni, a ti.
Nimin a mipui hnena thuchah a sawi ah IGP, LH. Shanliana chuan inkharkhip kenkawh mekah State dangte entawn tlakin Mizo mipuiten thupek an zawm tih a sawi a, State dang thuthar thehdarhtuten Mizorama inkharkhip hman dan a thatzia tarlanga midang entawn tlaka min ngai chu mipuiten dan leh thupek kengkawhtute an tawiawm that vang a ni tih sawiin, lawmthu a sawi bawk.
Mizoram Police-a IGP LH. Shanliana chuan Mizoram-ah he hri alo lut ve thei a ni tih hriat anih veleh sawrkar thupek angin March ni 11, 2020 atangin State dang leh ramdang nena inkalpawhna khar nghal vek a ni tih sawiin, Police ten uluk tak a ramri ven hna an thawh bakah Police indaihlohna hmunah khawtlang hruaitute ruahmanna in tlawmngai pawl ten an tawiawm bawk tih a sawi a, hemi kawnga khawtlang tawiawmna ah lawmthu a sawi a, hei bakah hian chhun zan zawma venhim hna thawktu Police ten inkharkhip laia mipui pawnchhuak tur an ven kawngah pawh Local Level Task Force ten hmun tam zawkah an venpui avangin lawmthu a sawi bawk.
LH. Shanliana chuan inkharkhip chhunga mipui mamawh phurtu lirthei te chu khawi ah pawh kaltlang tir turin venhim hna thawktute a chah a, heng bungraw phurtu lirthei tlan tlang khua a khawtlang hruaitute chu kan mamawh phurtute harsatna an neih theih lo sutkian pui a, theihtawp a lo buaipui turin a ngen a, khaw thenkhatin heng lirthei khaltute eitur leh mamawh an lo pe thin chu Mizote thatzia lantirna mawi tak nia a hriat thu a sawi bawk.

Comments

Chhiar Hlawhte