Serchhip District chhunga vantlang punkhawmna lam chi huaihawt khap a ni ta

Serchhip District Magistrate, H. Dolianbuaia chuan nimin, March 16, 2020 khan thupek tichhuakin nimin atang khan Serchhip District chhungah vantlang punkhawmna lam chi reng reng huaihawt khap a nih thu a tarlang.
Hemi chungchanga nimin a thuchhuah a siamah Serchhip District Magistrate, H. Dolianbuaia chuan khawvel ram hrang hrangin natna tihbaiawm an buaipui mek COVID-19 chu India ramah pawh a darh mek thu leh Mizoram thenawm State-ah te pawh hmuhchhuah a lo ni ta zel tih tarlangin, kan District chu he natna tihbaiawm tak laka kan lo fihlim theih nan thupek chhuah tula a hriat thu a tarlang a. Hei mai bakah hian Chief Minister hova ‘Emergency Meeting on Conoravirus (COVID-19)’ March 9, 2020-a neih leh Chief Secretary hova ‘State Level Task Force on Mitigation of Coronavirus (COVID-19)’ March 10, 2020-a neih chuan he hripui laka kan State a lo him theih nan mipui punkhawm khap leh ramri te ven uluk a tul thu te, hmalak nghal tur a nih thu te rel a nih thu a tarlang a.
Chuvangin COVID-19 hrileng hi a darh zel lohna turin leh mipuite kan him tlanna turin Section 144 of CrPC in thuneihna a pek angin Serchhip District chhung ah vantlang punkhawmna lamchi reng reng huaihawt khap tlat a nih thu te, Serchhip District chhungah Foreigner lo luh khap tlat a nih thu leh tul bik thilah chuan District Administration phalna lak hmasak hnuah chauh luh theih a nih tur thu te, Serchhip District chhungah State pawn ami lo lut te leh District chhung a mi, State pawn leh ramdang (foreign) a hna thawka awm leh zin te an In haw a nih chuan, thuneitute hnenah in report ngei ngei tur a nih thu tarlangin, hemi kawng ah hian khawtlang hruaitute leh NGO te pawhin hetiang mi an awm chuan thuneitu (District Administration te, Police te leh Health Department) te hnenah hriattir vat tur a nih thu te a tarlang a. He thupek hian Centre leh State Government Office kalphung pangngai leh sawrkar-in phalna a pek bik te a huamloh tur thu pawh tarlangin, he thupek hian a hun hmaa sut leh a nih loh chuan chhuah a nih (March 16, 2020) atanga thla hnih (2) a huam tur thu pawh a tarlang tel bawk.

Comments

Chhiar Hlawhte