VC inthlanna neih zawh a ni

Chakma Autonomous District Council (CA-DC) hnuaia Village Council (VC) inthlanpui leh Lai Autonomous District Council (LADC) hnuaia Council Veng VC seat khat hnawhkhah nana by-election chu Zirtawpni khan tluang taka neih niin result kimchang pawh hriat theih a ni ta a.

CADC-a inthlanna neihna tura ruahman VC 88 zinga VC 6 (Dursora, Chhotaguisury-I, Chhota-guisury-II, Gerasury, Ludisora leh Silbanga)-ah te chuan inthlanna neih ngai lovin inthlan chuh tuma hming pe te chuhtu awm lovin tling-ah puan an ni a. Heng te nen hian seat awm zawng zawng 516-ah MNF-in seat 372 lain, khaw 65-ah hnehna an chang a; BJP chuan seat 115 lain, khaw 16-ah hnehna an chang a; Independent candidate-te'n seat 27 lain, khaw 3-ah hnehna an chang a; INC-in seat 2 lain chak ber awm lohna (no majority) khua 4 a awm bawk. Hetihlai hian LADC hnuaia Lawngtlai Council Veng VC seat khat hnawhkhahna tura by-election buatsaihah chuan MNF candidate, Vanlalduhenga thlantlin a ni.