Serchhip District-a Health Deptt. a thawk ten COVID-19 chungchang an zirho

Serchhip District chhunga Health Department-a thawkte tan nimin khan Coronavirus (COVID-19) chungchang zirhona neih a ni.
Serchhip CMO Conference Hall-a he zirhona neih hi Serchhip CMO, Dr. Laldawngliana Sailo chuan kaihhruaiin tunhnaia khawvel in a buaipui, Coronavirus (COVID-19) lakah Mizoram a him theih nan sawrkar in nasa taka hma a lak thu sawiin, hei vang hian Health Department-a thawktute chuan he natna chungchang hi an hriatchian a pawimawh thu leh chumi atan chuan he zirhona hi buatsaih a nih thu a sawi a. Hemi hnu hian Dr. Lalhlunpuii, District Immunization Officer leh Dr. K. Lallawmzuala, Medical Officer ten he huna kalkhawmte hi zirtirna an pe a ni.
He huna thu sawitute chuan COVID-19 chungchangah hian Health Department-a thawk zawngte chu an pawimawh thu te, tunhma lam pawhin hetiang chi natna leng hi alo awm fo tawh thu leh mipuite tan chi-ai na tur awm lovin fimkhur erawh a tul thu te, he natna chungchangah hian WHO chuan thu thar a neih zel avangin thawktute chuan WHO website te tlawhin an inchhiar zau a tul thu te, he natna leng mek hi a tirah-ah chuan boruak atanga inkaichhawn theih ni lo a ngaih ni mah se tunah chuan boruak atanga kai theih nia rinhlehna a awm tawh thu leh hei vang hian sawrkar pawh nasa taka a inbuatsaih thu te an sawi a. Tun dinhmunah Mizoram-ah he natna kai hmuhchhuah la awmlo mah se keini aia ram changkang zawk-ah pawh hmuhchhuah an nih hnuah chuan thunun a harsat tawh avangin he hri hi a lo luh lohna tura lo inbuatsaih chu hna pawimawh hmasa a nih thu te an sawi a, tuna zirhona neih a nih bakah hian training pawh buatsaih chhoh zel ala tul dawn thu te an sawi bawk a ni.
Hei bakah hian mipuite tan puipunna hmun hrang hranga kal loh a pawimawh thu leh mi tamna hmunah awm lova mahni In lama inkhunghran a pawimawh thu te, tul fe-ah lo chuan zinchhuah loh a pawimawh thu te, he natna hmuhchhuah tawhna atanga rawn haw te chu ni 14 chhung tal enthlak tura khunghran a pawimawh thu leh chutiang mi chu thuneitute hnena in report thlap thlap tur a nih laia in report duhlo leh khunghran duhlo an awm chuan thuneitute nen tihluhna pawha hmalak ala tul mai theih thu te tarlan a ni a. Tun dinhmunah Serchhip District chhungah hetianga khung hran hi mi engemaw zat awm tawh mah se he natna kai nia rinhlelh erawh an la awmloh thu leh ramdang atanga Serchhip District tlawhpawhna te pawh khar vek a nih tawh thu te tarlan a ni bawk a. Hemi hnu hian zawhna leh chhanna hun hman niin he natna laka mipuite an him theihna tura rawtna awm hrang hrangte pawh sawiho a ni bawk.

Comments

Chhiar Hlawhte