Coronavirus zirhona nei; mi 135 khung hrang mek

Coronavirus leng mek chungchangah Inrinni khan Aizawl-a Health Directorate Conference Hall-ah Training of District Trainers on COVID-19 neih a ni.
He Training-ah hian Mizoram District hrang hrang atangin Health Department-a hotute telin he hunah hian Dr. Pachuau Lalmalsawma chuan ngenna siamin Sawrkar leh Private damdawi In zawng zawnga damlo te tlawh danah pawh fimkhur a tul thu sawiin, chhungte hnaivai tak tak leh damlo tana tangkaina tak nei si lo te chu insum turin a ngen a, he ngenna hi mipuite him tlan zawkna tur atana siam a nih angin zawm ngei nise a ti a. He natna hri kai leh kai lo endikna ah Covid-19 lenna hmun atanga lo haw hmaihpalh an awm anih chuan Call Center No. 102 leh 0389-2323336, 2318336 ah te eng hun ah pawh hriattir zel turin a chah bawk a ni.
He Training-ah hian District hrang hrang atangin Medical Superintendent leh Chief Medical Officer ten an bial chhung theuhva an hmalak dan leh rawtna an thlente sawiho a ni a. Tun thla ni 6-a WHO-in New Delhi-a Training of Trainers a buatsaih a zuk tel te leh Rapid Response Team Member ten chawhnu lamah training an pe a, heng an hriat thar te hi training a kalte hian anmahni awmna District theuh ah zirtirna an pe leh chhawng dawn a ni.
National Health Mission (NHM) Project Director, Dr. F. Lallian-hlira chuan Coronovirus chungchanga Mizoram sawrkar hnuaia Health Department hmalakna langsar zual tarlangin, Lengpui Airport-ah uluk leh fimkhur taka nitin screening neih a nih thu te, sample lakna tur hmunhma pawh Aviation lam thuneitute nena thawkho in Lengpui Airport-ah Room awl siam a nih tawh thu te a sawi a. Hei bakah hian khualzin rinhlelhawm, In-a inkhung hrang theilo tura ngaih te tana khung hranna hmun siam a nih thu te, Mizoram Border hrang hrangah uluk taka checking neih chhunzawm zel a nih thu te a sawi bawk a. Thawktu duhthusama indaih-lohna karah mumal leh tha zawka he hri laka mipuite an lo him theih nan a theih ang anga thawktute pawh siamrem an nih thu a sawi bawk.
Hetihlai hian Mizoram-ah Coronavirus vei an la awm hriat a ni lova, fimkhur thil thu ah mi 143 khunghran an ni tawh a, heng khung hran ho zinga 8 chu pawn chhuak thei an ni tihchian a ni a, tunah hian mi 135 te chu la khung hran mek an ni a. Corona Virus laka him turin fimkhurna leh chet thianghlimna te mitin tan hmanraw pawimawh ber a nih avangin fai taka Kutsil fo te, midangte an him zawk nan ual au taka khuh leh hahchhiau loh te bakah tulna bik tak neite a nih ngawt loh chuan zinchhuah loh hram hram rih a that thu te sawiin, mipuite pawh punkhawmna lama kal tam lo turin a chah bawk a ni. 

Comments

Chhiar Hlawhte