Health Minister an chhuang

MNF Party chuan Covid-19 chungchanga Health Minister, Dr. R. Lalthangliana hmalakna chu chhuanawm an tih thu an sawi.

Nimin-a thuchhuah an siamah MNF Party chuan natna tih-baiawm tak, khawvel tibuaitu leh ram zawng zawng tiralkheltu 'Covid 19' laka Mizoram kan him theihna turin Health Minister, Dr. R. Lalthang-liana chuan a tirte atangin a theih ang angin hma a la nghal char char tih tarlangin, Foreign leh State dang atanga khualzin lut chhuakte luhkapui ber Lengpui Airport-ah te, Hospital hrang hrang leh International Boundary thlengin Check Post siamin, State dang nena inkalpawhna ah te Medical lam duty-te siamin Screening neih thin a ni a, a hmun ngeiah vawi duailo kal chilhin thawktute dinhmun enfiahin, hmalak tur tul ang angte mutmawh hnarmawh ah neiin a kal chilh zung zung tih an tarlang a. Chief Minister hovin Cabinet Meeting te kovin, sawrkar Department hrang hrang bakah Kohhran leh NGO hrang hrangte thawhhopuiah sawmin vawi duailo Health Minister hian Corona Virus laka kan him theih nan Meeting a ko tawh bawk niin an tarlang.

MNF Party chuan mahni mawhphurhna hria, a tih tur tak ti zung zungtu Health Minister chu fakawm an tih thu leh an chhuang takzet tih tarlangin, Health Minister hmalakna pawmpuia Coronavirus laka invenna chungchanga thinlung taka inhawnga thilphal taka a tul anga hman tur sum ngaihtuahsak nghal zeltu Chief Minister, Zoramthanga pawh chhuanawm an tih thu an tarlang a. Mi tam takin an nghahhlelh em em Co-ronavirus test-na khawl lei tur pawhin Mizoram sawrkar chu a inpeih tawh nachungin, khawl lei chu Bazar-a Anhnah tel lei anga lei mai theih anga thiltih awlsam a ni lo tih tarlangin, hetih mek lai hian Mizoram sawrkar chuan neih ngei tumin hma a la mek thu leh, chuti maia lo thleng mai thei tur a nih loh thu an tarlang bawk.