Thlai thar lakkhawm a ni

Covid-19 laka inven nana rampum huap Lock Down kalpui a nih mek laiin mipui ten eitur thlai leh Anhnah lam an tlakchhamlohna tur leh thlai huan neitute pawn an thlai tharte chhe mai lova suma an chantir theih nan sawrkar chuan chak takin hma a la zel.
Horticulture Department changtu Chief Minister, Zoramthanga hmalakna in hemi chungchangah hian Nodal Department - Horticulture Department, Commerce & Industries, MIZOFED leh Local Task Force te tang-kawp chuan Mizoram sawrkarin tualchhunga thlai thartute thlai tharchhuah dehralna tur a ruahman, Local Vegetable Supply Chain chu a kalpui a. Horticulture Department Director, Dr. Elizabeth Saipari chuan Mizoram sawrkar ruahman angin Serchhip District Task Force on Covid-19 a Chairman leh Serchhip DC, H. Dolian-buaia  leh  Serchhip DHO, M. Vanlalzami bakah Agri & Horti Co-op Society, Serchhip te chuan hma  la nghalin, heng thlai te hi Zirtawpni zan zanlai-ah khan Serchhip Bazar atangin Motor Trip 18 lai phurchhuaka semchhuah a nih thu leh Ar vulhtu mangangte ta Arsa 28.0 Qtls. an hralh chhuahsak bawk tih a sawi.
Serchhip atanga thlai thar te Aizawl-a lakluh a nih bakah hian Thingsul Tlangnuam, Tlungvel leh Aizawl chhehvel atangin Mizo thlai chi hrang hrang Behlawi leh a dangte, Thei, Balhla leh Thingfanghma lak luh a ni bawk a. COVID-19 Vegetable Supply Chain hnuaia Aizawl-a thlaithar lakluh tawh zawng zawng hi Trip sawm-hnih (20 Trips) chuang a ni.
Local Vegetable Supply Chain-ah hian Horticulture Department, Commerce & Industries leh MIZOFED te an tangkawp a. Designated Collection Centres (i.e, Ngaizel, Chanmari, Bara Bazar leh Vaivawkawn Market)-ah a thlen tura ruahman a ni. Heta tang hian LLTF ten an hun chan dan angin  an lam ang a, an Veng-ah theuh an sem leh theih tur a ruahman a ni. Thlai lakluhte hi MIZOFED chuan a man an pe nghal a ni.

Comments

Chhiar Hlawhte