Lockdown chunga mipuite tan ni 100 inhlawh theih turin ruahmanna siam a ni

Rural Development Minister, Lalruatkima hmalakna-in Mizoram Sawrkar chuan Mizoram-a Lockdown chhung pawha mipui ni 100 inhlawh dan tur ruahmanna a siam.

Nimin-a sawrkar thuchhuahin a tarlan danin MGNREGS kalpui mekah hian inkharkhip a nih avangin a taka hna thawh theih hmain sum mamawh zat tur dilna lo siam lawk a ni a. Boruak a pangngai chhoh veleh hna hi a taka thawh tura ruahmanna kalpui mek a ni a. Hei hi a dan pangngai ah chuan phalloh a ni chungin mipuite harsatna hriain hetiang hian ruahmanna sawrkar chuan a siam a ni. MGNREGS hnuaia ni khat hlawh chu mi pakhat-ah Rs. 211/- atangin Rs. 225/- ah tihsan a ni bawk a. Hei hi kumthar, April atanga hman nghal tur a ni. 

Ni 100 inhlawhna hi District thenkhat chuan sawrkar kum kel mek, 2019-20 chhung atan an thawk zo tawh a. Ni 100 la inhlawh ve lo District te pawh tunah hian demand siamtir mek an ni a. Central Ministry of Rural Development atangin MGNREGA inhlawhna (Wage) chu March ni 3 khan cheng vbc. 30.22 leh March ni 17-ah cheng vbc. 15.31 Mizoram sawkarin a dawng a. NeFMS (National Electronic Fund Management System) hmangin Job Card holder-te Account-ah thun a ni tawh niin sawrkar thuchhuah chuan a sawi a. Tunah hian sawrkar kum 2019-20 chhunga Mizoramin a la dawn kim loh hi pechhuak thuai turin nasa taka hmalak a ni a. RD Minister, Lalruatkima pawhin hun harsa tak karah amah ngeiin RD Ministry-a Official pawimawh Secretary leh Joint Secretary-te a dawr a. India rampumah office hnathawk ten an hna an thawh mumal theih loh avangin harsatna a awm mek chungin Mizo mipui ei leh bara chhuanchham an awm lohna turin la pekchhuah loh cheng vbc. 40 chuang hi rawn pe chhuak thuai turin Minister chuan a hrilh a. RD Minister hmalakna avang hian kum 2019-20 ah hian District tin ten ni 100 an inhlawh dawn a ni. 

Kum 2020-2011 chhung hian Job Card Holder tinin ni 100 theuh an inhlawh theihna turin Sawrkar laipui chuan 200 lakhs persondays chu Labour Budget atan Mizoram sawrkar tan a remtihsak tawh bawk tih sawrkar thuchhuah chuan a tarlang bawk.