COVID-19 KAN DO

COVID-19 KAN DO

                   -H.Lalrinawma

Kan hlauh em em Covid-19 chuan min rawn luhchilh in kan tual a rawn thleng ta. A hma pawha kan chiai sa tawh nak alaiin a thlaphan thlakin fimkhur lehzual a tul mange.

Veng tinah Sorkar thupuan Lockdown tihlawhtling turin Task Force kan duty a, YMA ten sul kan su lo theilo. Engkimah YMA in a chhiat that ah mawh kan phur leh ta. Hetah hian fimkhur erawh a tul mange. 

Kan la ti tan dawn chauh ani si a, kan boruak kal vela kan hmuh leh hriat atanga ka ngaihdan thenkhat...

1. Fimkhurna tur dik :

Hri put darh hlauin Committee leh inkhawm pawh kan ngam lo a, thenawm inlenpawh pawh kan hreh. Mike atangin kan invau khur2 a, veng thenkhat ah phei chuan pawn a chhuak hlek pawh hming malin kan in au hial. Hetih laia kan bazar hun hawn dan leh kalpui dan hi a va fuh silo em. 

Sorkar thupuan ah nitin mamawh leh damdawi zuar  te, Petrol pump te inhawn pal anih laiin kan tualchhung danin kan inkhap a. zingkarah hun chep tak hawngin fimkhur lo takin kan ri leh lui lui bawksi. Hei hian kan in kharkhipna a ti fail vek zawk lo maw....?

Heng sorkarin a phal chin te hi nilengin in hawng zawk se, dawr nghaktu in fimkhur takin mask leh glove vuah se, a dawr tute inchhung lut loin an mamawh rawn pe mai se. Hun chep taka inhawn tir a mipui fimkhur senglo a insiam ai chuan kan tumah hian kan fuh zawk ngei ang.

Tin, mamawh tur inlak lawk tur tih a, karkhat chhung inkhar vek law law pawh a fuh zawk maithei.

2. Lirthei luh khap :

Thu thang ah chuan - Chhingchhip chuan an khaw paltlang a lirthei tlan an phal lo, Khawbel in lirthei luh phallo in road block an siam, etc etc.. tih te a awm nual mai. Bukpui ah chuan mike hmangin feh tur te lirthei pal tlang leh veng dang atanga an veng ram chhung a feh/hnathawh an remtih loh thu an puang bawk. Kan hlau a, kan fimkhur a, a awm viau e.

Mahse fimkhur luat a hlauh loh tur thleng thleng a hlauh hi tullo a mipui te tih chiai na mai ani thei. Mike hmanga au phei chu mipui tithlabar zawng ai chuan thlamuan thei zawng zawn a tha hle.

A thuhrimin lirthei tlan khap tih ngawt te hi kan thuneihna piah lam anih bakah (kan lo ti tak tak anih chuan) kan tih ang hian Kolasib tlangdung te khuan ti ve ta se hripui hlauh vangin hri kai siloin riltamin kan in hrek hlum mai ang tih pawh hlauhawm zawk ani.

3. Lirthei check : 

Kan duty post paltlang tur lirthei te kan lo check thin a, thil tul ani. Mahse fimkhur deuh a tha lo maw.

Aizawl lam a Hospital pan ngai motor pakhat chu duty ten College pengah rei tak an dintir hnuah Chhiahtlang a duty post pakat ah reife an din tir leh thu an sawi. Tunlai ah chuan pass/permit neilo a tlan tlang tum chu an awm manglo turah ngai ila, kan lo tiding a pass kan lo ensak anih pawhin chelh khawtlai lo a kaltlang tir ran a tha hle. Fimkur thilah pawh an lehka laksak a chhiar kher tum ai chuan an ken lai va thlek zawk mai kha a him zawk ang. Tin, YMA te hian inti duty taka mi harsatna siam ai chuan puitu nih zel tum a tha. Lirthei kal tlang te duhsakna nena tawngkam mawi taka thlah a, mipui mamawh phurtu motor te phei chu hlim taka chhuah zel hi kan zir a tul hle.

4. Feh/hnathawh khap :

Veng tam takah chuan hnathawh chhuah hrim hrim kan inkhap ani awm e. Chhungkaw tam tak hi eichawp zawng takmeuh, mi chhiat that ah pawh duh anga tawiawm theilo khawpa harsa te kan ni. Chung mi ten inveng fimkhur si a chhungkaw hna an thawh theih dan tur remchang kan inzawnpui a tul hle. Ni 21 lockdown chhung a engmah kan thawh loh chuan tam kan hmabak ani mai dwn. Ram riak thei phei chu ram riak bo daih hlawm ila hlawhtling takin kan in quarantine ani mai zawk ang.

A himlo rinhlelhawm lakah fimkhur ila, a la him chin ah chuan chintawk neih deuh a ngai.

 Entirnan - Vanchengte hi an la him tlang anih a, khual atanga lut an awm thar loh a, khaw danga chhuak an awm bawk siloh chuan an tan chuan inkharkhip sa an ni a, inkawm kawm, inkawm leh feh ho pawh khap kher a tullo thei.

He kan hripui hi mithiam ten an sawi danin boruak a leng ni loin a a vei sa in midang a kaichhawn a ni a, inkaichhawn theihna - inkhuh khum, taksa in sik leh a vei te kawih hnu khawih ah te fimkhur ila. Chutiang nilo a uchuak lutuk a lo hlau (kawngpui a motor tlan tlang ringawt hlauh ang chi) leh mipuite pawngpaw thlabar vak tur te thlamuantu i ni zel ang u.