COVID-19 laka Mizoram mipuite him theih nan The Mizoram Epidemic (COVID-19) Regulations, 2020 siam a ni

COVID-19 laka Mizoram mipuite him theih nan leh hriselna vawnhim a nih theih nan Mizoram sawrkar chuan 'The Epidemic Diseases Act 1897' behchhanin ‘The Mizoram Epidemic (COVID-19) Regulations, 2020’ chu a tichhuak a. He Dan hian Mizoram pum a huap ang.

Hemi chungchanga sawrkar thuchhuah in a tarlan danin he Dan siam thar hnuaiah hian Hospital zawng zawng (sawrkar leh private) te’n COVID-19 vei nia rinhlelh leh inringhlel te enna tur bik hmun, Separate COVID-19 Corner an siam tur a ni a. An dinhmun a zirin an chenna In-a inkhung (Home quarantine) tura thurawn emaw, damdawi In-a dahhran (Isolate) ngai te dahhrang turin emaw an ti thei ang. COVID-19 vei hmuhchhuah emaw rinhlelh reng reng emaw an nei a nih chuan Health Department-ah an hriattir (notify) nghal tur a ni a. COVID-19 chungchanga Mizoram kaihhnawih leh dinhmun reng reng thu diklo leh belhchian dawllo tuman an thehdarh tur a ni lo a. Mizoram kaihhnawih leh dinhmun dik tak chu Principal Director leh State Nodal Officer (IDSP) te’n Official-a an puanzar chauh rin leh pawm tur niin Private Laboratory te’n COVID-19 test an ti tur a ni lova. Sawrkar chuan a tul dan ang zelin Sample Collection Centre a ruat dawn a ni.

He Dan hnuaiah hian COVID-19 hluarna ram leh hmuna ni 28 kalta chhunga zin te chu sawrkarin Screening point a siam ah te an in report ngei tur a ni a. Sawrkarin inkaihhruaina a siam ang zulzui zelin Home quarantine in emaw, Designated Quarantine Facility-ah emaw Isolation Facility-ah dah an ni ang a; an zawm duhlo a nih chuan tihluihna hmangin thuneitute’n heng hmunah te hian an dah lui thei ang. Quarantine hun chhung hian inkaihhruaina tha takin an zawm tur a ni a, insawiselna an neih chuan State Helpline-ah an in report thuai tur a ni bawk.

Hei bakah hian Ramdang emaw, State dang atanga lokal te reng reng chu sawrkarin Screening Point a siamah sreening turin an in report ngei tur a ni a. Ramdang leh hmundanga zin chhuak lem lo, insawiselna nei te chuan a rang thei ang berin State Helpline-ah in hriattir bawk tur a ni.

The Mizoram Epidemic (COVID-19) Regulations, 2020 hian District Bawrhsap te pawh thuneihna pe in chhan tha tak a awm chuan DC te chuan an District pum huapin emaw, an District chhunga hmun khawilai bik emaw ah – hmun khar (sealing), mi luh leh chhuah khap, School/ Office/Institution/Establishment khar, mipui punkhawm khap, Motor tlan khap, COVID-19 veite chhuizui tir, rinhlelhte khung hran, Building awmsa Quarantine Facility/Isolation Facility atana hman tir leh sawrkarin tul a tih thil dangte tih theihna an nei dawn a. Heng thil te hi State pum huapa tih a ngai a nih chuan Chief Secretary in thuneihna a nei anga. DC te hian an District chhunga sawrkar hnathawk te he natna dona kawngah a tul ang zelin mawhphurhna a pe thei anga, sawrkar hnathawk lo te puihna pawh an ngen tel thei bawk ang.

He dan kengkawh tura thuneihna pek (Authorised Persons) te chuan a tul angin ramdang leh hmundanga COVID-19 report tawhna atanga lo kal te chu Home Quarantine emaw Designated Quarantine Centre-ah an dah thei anga. Heng mi te zinga symptoms nei bik te phei chu ‘Isolation Facility’ ah an admit nghal thei a, thupek zawm duhlo te chu dan zawm tura tihluih theihna tur thuneihna an nei bawk ang. COVID-19 vei ngei nia rinhleh an awmin mipui leh khawtlang an him zawkna tur nia ngaih ah chuan an chenna ah kalchilhin, damlo endik theihna leh a tul dan a zirin damdawi In-ah an admit thei bawk ang. He dan hnuaia regulations hrang hrang te zawm lo emaw, bawhchhia emaw an awm a nih chuan Section 188 of Indian Penal Code (45 of 1860) hmanga hrem theih an ni bawk anga. He Dan hi kum khat chhung hman tur a ni ang.