Industrial Development Board thutkhawm neih a ni

SEDP hnuaia Industrial Development Board chu niminpiah khan Commerce & Industries Minister, Dr. R. Lalthangliana hova thukhawmin Industrial Development Board hnuaia hmalakna tur hrang hrang an sawiho.
Aizawl Secretariat Conference Hall-a Industrial Development Board thukhawm hian thalai lehkhathiam te rilru-ah mahni kut ke-a entrepreneurship hmanga eizawnna kawng an ngaihtuah thei nan Govt. J. Thankima College-a Industrial Demo Chamber atana building mamawh sak nan sum pek an remti a. Phainuam BRP Brick Factory Self Help Group in leirawhchan siamna project an thehluh chu a hmunah Board Member leh Department aiawh te kalin enfiah an rel a. SEDP Apex Board in Handloom Sector tih hmasawn nan Pilot Project atana cheng nuai 260 a ruahman chu beneficiaries te pek dan sawiho niin hemi hnuaia loom sem turte chu a siamtu tur uluk taka thlan nise an ti a. Hemi ruahmanna hnuaia beneficiary mi 146 te khawl leh buangrua pek an ni dawn a ni.
Baktawng Carpentry Cluster atana State Matching Share thawh tur chu a rang lamah bawhzui nise tihrel a ni bawk a. District 11 atana Baseline Survey chu tan vat nise tiin hemi atan hian District tinah cheng nuai 1 zel ruahman a ni a. Commerce & Industries Department hnuaia District tina District Industries Centre te chu SEDP hlawhtlinna tur project leh proposal tha ngaihtuah chho zelin Board a thehluh nise an ti a. Grant-in-Aid Scheme hnuaia ruahmanna awmte chu SEDP nena thlunzawma kalpui nise tiin, Balu leh lung tha lakna inkalpawhna kawng thalo siam nan Mineral Link Road siam chu Board in an pawm a, hma la turin Geology, Mining and Mineral Resources Department ruat a ni bawk.

Comments

Chhiar Hlawhte