COVID-19 chungchanga Serchhip District-a hmalak zui zel dan tur ngaihtuah a ni

Serchhip District Task Force Committee on Novel Coronavirus (Covid 19) te chu nimin khan Serchhip DC Meeting Hall-ah an Chairman, H. Dolianbuaia hova thukhawmin, Serchhip District chhunga he natna laka inven dan tur chi hrang hrang an rel.

He thutkhawm ah hian Bawrhsap, H. Dolianbuaia chuan Meeting koh a nih chhan sawiin, he natna hi sawrkar chuan Disaster anga lo hmachhawn tura ruahmmanna a siam thute a sawifiah hnuah, Member Secretary leh Serchhip CMO, Dr. Laldawngliana Sailo chuan Novel Corona-virus chungchang leh Health Department lam atanga Serchhip District inbuatsaihna tlangpui report a pe a. District chhunga PHC, CHC leh District Hospital-ah te Covid-19 vanga damlo te dahna tur hmun siam vek a nih tawh thu a sawi a. Mahni in lama inkhung hranna neilo tan District Hospital ah hmun zuat a nih tawh thu a tarlang bawk. Dr. ZD Lalmuanawma, Medical Superintendent leh Dr. Lalhlunpuii, DIO te pawhin hmalakna te an tarlang bawk.
He Meeting hian District Magistrate thupek anga State pawn atanga lo haw te in report-na tur leh an inkhung hran dan tur ngaihtuah niin Foreign leh State pawn atanga Serchhip District chhunga lo haw zawng zawng te chuan Dr. Lalhlunpuii, DIO Ph. No. 9436361253, PC. Laltanpuia, Addl. SP Ph. No. 7005356608, Denny Lalchhuanawma, SDC, Ph. No. 9862359169 leh Vanlalduhi Ralte, DO Ph. No. 6009671590-ah te in report-in anni hian a tul angin an inkhung hran dan tur an ngaihtuah pui thin ang.
Nimin-a Task Force Meeting hian, Koh-hran zawng zawnga sem turin ngenna lehkha an siam bawk a, In tlawh kual-a thil zawrh lam chi reng reng a khap bawk a. District chhungah Covid-19 kai an lo awm palha inenkawlna tur hman-raw pawimawh thenkhat lei dan tur te pawh sawi niin, damlo enkawlna hmun atan building thlan pakhat, Nursing School Building pawh a tul anga chei dan an ngaihtuah nghal dawn a ni.
Nimin thleng khan Mizoram chhungah mi 41761 te chu enfiah ni tawhin nimin khan mi 10 te chu dahhran leh niin heti hian he natna avanga dahhran hi mi 163 an awm tawh a, mi 10 te sample chu enfiah tura thawn ni tawhin he natna hri kai leh he natna kaihhnawiha damdawi In-a enkawl leh nunna chan an la awmlo thung.

Comments

Chhiar Hlawhte