Latest News

MZI hruaitu thlanna nei

Mizo Zaimi Inzawmkhawm (MZI) Hqrs. Serchhip chuan nimin khan kum 2021-2022 chhunga an hruaitu tur thlanna MJA Serchhip District kaihhruaiin an nei a, President-ah Otto K. Lalchhuanawma (P&E Veng); Vice President-ah Lalramnghaka Kawlni (Tuikhuah Veng); Secretary-ah C. Zodinthara (Leisang Veng); Asst. Secretary-ah R. Lalrinfela (Bazar Veng); Treasurer-ah Lalnunsiami Khiangte (P&E Veng) leh Fin. Secretary-ah Johny Lalhruaitluanga (Venglai) te thlan an ni.

1994 Accord tih puitlin ngai pawimawh turin duh

Sinlung Hills Accord Implementation Demand Committee (SHAIDC) chuan Mizoram sawrkar chu kum 2018 Accord aia kum 1994 Accord-a a bat chu ngai pawimawh hmasa tura an ngaih thu an sawi.
Nimin-a Aizawl Press Club-a thuthar thehdarhtute an kawmna ah Sinlung Hills Accord Implementation Demand Committee (SHAIDC) chuan Mizoram sawrkar leh Hmar People's Convention (HPC) ten kum 1994-a inremna thuthlung an ziah tih puitlin a ni lohna chungchang ah May 25, 2016 khan Gauhati High Court, Aizawl Bench-ah an zualko tih sawiin, he inremna thuthlung a Para 5.1 leh 5.3 te chu ti puitling tura Order chhuah a nih thu leh chu chu Mizoram sawrkarin a tihpuitling loh avangin October 9, 2018-ah Contempt of Court Case Order chhuahin kumkhat chhunga ti puitling turin hun pek leh a nih thu an sawi a. Chu pawh chu State sawrkarin a tih puitlin loh avangin kumin February 21 khan Guahati High Court chuan Mizoram sawrkar chuan chawlhkar li (4 weeks) chhunga ti puitling tura a intiamna dungzuiin thil a tih ngei thu affidavit siam turin thupek a chhuah zui ta tih an sawi. SHAIDC chuan Mizoram sawrkar leh HPC inremna, 1994 Accord tih puitlinna atana High Court-a zualko chu an hna pui ber a nih thu sawiin, chutihlaiin tun hma ang bawka chhuanlam fahrah te te hmanga Sawrkarin a tih tur a ti lo a nih chuan a tul ang chen chen an kal zel dawn tih an sawi bawk.

Comments

Chhiar Hlawhte