Mizoram-ah infiamna Programme thar siam khap a ni ve leh ta

Khawvel ram hrang hranga Coronavirus leng chuan Mizoram pawh nghawng zelin Mizo-ram-a Sports Association te chu programme thar siam khap niin a siam mek te pawh entu mipui awm phal a ni lo.
Hemi chungchangah hian nimin khan Mizoram State Sports Council chuan thuchhuah siamin COVID-19 chungchanga State Level Task Force on Mitigation of Co-ronavirus (COVID-19) in a rel angin mipui vantlang kalkhawmna reng reng buatsaih lo tura tih a ni tih tarlangin, Mizoram-a Recognised State Level Sports Association leh District hnuaia District Sports Association/Club te chu Sports Championship/Tournament, Seminar/Conference te  ti tura hmalak laklawh alo awm a nih pawhin thu leh awm hma chu thulh (cancel) vek tura ngen leh hriattir an ni tih a tarlang a. Amaherawh chu he thuchhuah siam hmaa Tournament kallai a lo awm a nih chuan a khel mek turte Players leh Technical Official tlemte bak entu awm phal a ni lo tih a tarlang bawk.
Hei bakah hian Mizoram State Sports Council enkawl Indoor Stadium zawng zawng leh Playfield zawng zawngah te allotment siam a lo awm tawh a nih pawhin cancel vek tur a ni tih pawh an Mizoram State Sports Council (MSSC) thuchhuah ah hian tarlangin, Tournament emaw, Championship emaw buatsaih nan allotment pek pawh a remchang tawhlo tih a tarlang a. National Sports Federation in National Championship leh Tournament a buatsaih tur reng reng pawh cancel vek a nih thu pawh he thuchhuah ah hian tarlangin, International Sports Federation te pawhin International/World Championship nei tura a tih pawh cancel deuh vek tawh bawk a ni tih a tarlang a. Heng te avang hian Mizoram State-a kan Championship/Tournament tur Programme pawh cancel vek tura ngen a nih thu an tarlang bawk.

Comments

Chhiar Hlawhte