Serchhip-ah COVID-19 chungchanga hmalakna hrang hrang Bawrhsap hova thlirho a ni

Serchhip District Level Task Force on Covid-19 chu nimin khan an Chairman Serchhip DC, H. Dolianbuaia hova thukhawmin hmalakna hrang hrang an thlir bakah hmalak zelna turte an sawiho a. Serchhip khawchhung mipui ten an nitin mamawh an lakkhawm dan turah ruahmanna siam a ni bawk.

Serchhip DC Meeting Hall-a Serchhip District Level Task Force on Covid-19 thutkhawm ah hian Serchhip District SP, R. Sathiyasundaram IPS chuan Ministry of Home Affairs leh Govt. of Mizoram atanga District chhunga hnathawktu leh zin vak tangkhang la awm mekte tana hmalak dan tur ruahmanna te sawiin, hemi chungchanga hmalak tawhna te chu SDO (Sadar), C. Lalduhzuali chuan a tarlang bawk a. Heng tangkhang mek te hi an ILP atangin zawnchhuah vek an nih tawh a, Company hnuaia thawkte pawh tlawhpawh vekin, an mamawh an lak theih nana permission siam sak an nih tawh thu te, chen lailawkna neilo an awm palha an lo chen lailawk nan Serchhip-ah Boxing Hall, Thenzawl-ah JNV School Hostel leh North Vanlaiphai-ah PWD IB te ruahman a nih thu tarlan a ni a. Hnamdang hnathawka awm emaw, zin vak tangkhang harsatna nei chuan thuneitute hnenah a rang lama hriattir thin tura tih a ni bawk.

Hei bakah hian Food, Civil Supply & Consumers Affairs Department, Excise & Narcotic Department te leh Heath Department atangin an hmalakna te ngaihthlak a ni a, tun dinhmunah Petrol Pump te dinhmun a thain, sawrkar in a thlawna buhfai a pek chhuah chu retailer hrang hrangah sem mek a ni a. Excise & Narcotic Department pawhin ngawrh taka hnathawkin, an hnathawhna lama an mamawh thilte pawh a awm theih ang ang pek tura tih a ni a. Medical lama mamawh thil te lain Health Department chu Aizawl-ah an intir mek a, heng hmanrua te hi District chhung khaw danga sem theih chi a awm chuan a ranglam sem zui ve tur a ni ang.

He huna tarlan a nih danin tun dinhmunah Serchhip District-ah Home Quarantine mi 360, Quarantine Facility-a awm mi 49 leh Isolation Facility-a awm mi 3 a awm mek a. Home quarantine atanga chhuak tawh mi 44 leh Quarantine Facility atanga chhuak tawh 2 an awm bawk a ni.

He Meeting-ah hian Serchhip khaw chhung mipuite tana Serchhip Bazar Area huamtu Village Council ( Serchhip-IV VC) ten Bazar dan tur ruahmanna an siam chu ngaihthlak a ni a, tlema tihfel ngai te tihfela siamrem niin hei hi khawpui chhung Local Task Force tinte kaltlanga kalpui tur a ni anga. District chhung khaw dang atanga mamawh lei duhte chuan an khaw Task Force te hnenah an mamawh an thlen khawm anga, an Local Task Force in a hlawmin Serchhip-ah eng ni-ah pawh an rawn Bazar sak thei anga, Bazar Area a an va dawr duh dawr neitute pawh Serchhip-IV VC Task Force te hian inhawng turin an ngen sak thin dawn a. VC Area danga awm a nih chuan a awmna Local Task Force ten hawng turin an ngen sak thin bawk ang.

Serchhip District hi thlai tharchhuahna hmunpui pakhat a nih avangin Supply Chain Management Programme enkawltu tur bik Committee pawh nimin vek khan Serchhip DC kaihhruaina hnuaiah din thar niin Order pawh tihchhuah nghal a ni bawk.