Serchhip District Level Task Force on Covid- 19 in khauh lutuk-a kal tha an ti lo

Serchhip District Level Task Force on Covid- 19 chuan tunlai-a hri leng mek avanga Veng leh khaw bil inkharkhip te, thingtlang lama feh inkhap te leh uchuak taka lo khauh fal te rem an tih loh thu an sawi.

Vawiin March 26, 2020 khan Serchhip District Level Task Force on Covid- 19 te chu Serchhip DC Meeting Hall-ah an Chairman Serchhip DC, H. Dolianbuaia hovin an thukhawm a. He Meeting hian mahni khaw bil-a lo inhung leh midang ngai theihlohna lam chi te, Essential Commodity phurtu lo dan te, thingtlang lama feh inkhap te leh uchuak taka lo khauh fal te rem an tih loh thu an sawi a. Meeting chuan, District chhunga Village Level a Task Force, Lock Down a hlawhtlin theih nana hah taka thawktute zawng zawng chungah lawmthu sawiin, chutih rualin, Lock Down kan kalpui danah mipuite tana harsatna thlen tlem zawnga hmalak a tul thu an sawi a, sawrkar thupek anga ni 14 chhung inkhung hran ngai te tha taka kan khung hran leh mipuite a him tawka inhlat (social distancing) tura tha taka kan inenkawl theih chuan kan nitin mamawh thil te, leh ei leh bara rei zawk kan buai chhoh loh nan Village/Local Level Task Force tena an zawm tur thil pawimawh hrang hrang an rel a ni.
He Meeting hian mahni khaw bil-a lo inkharkhipa, khawchhung-a midang emaw, lirthei eng chi mah luh lo khap ve ringawt loh nise tiin, an khawchhungah din khawmuan emaw, chawlh leh riah te an remti lo a nih chuan chutiang khapna chu an siam a nih pawhin a hriat thiam theih tih an sawi a. Khawtin in mahni khua kan inkharkhip ve vek chuan kan tuar tlang thei tih kan hriat a tul thu sawiin, hei hian sawrkar thupek anga khar tur a tih hmun te erawh a huam tello tih an sawi a. Essential Commodity phurtute leh thawktute phei chu lo dan a rem lo tih pawh sawiin, tunlai hi Lo hal zawh hlim, Mangkhawh tul hun, Thlai chi thlak hun a nih avangin, khawchhunga mi te chu, inkhung hrang tura tih (zin haw) an nih lem loh chuan an Lo lama hnathawk tura an kal lo khap sak hi a rem loh thu leh a huna Thlai kan thlak loh te, Mang kan khawh loh te hian kumtluana kan ei bar zawnna a tihchhiat der theih avangin, District chhunga khawtinte lo inkhap lo tura tih an ni a. Heng te hi Chief Secretary in a ngai pawimawh tih pawh he hunah hian tarlan niin Vawiin-a Video Conference, District tin Authority te nena a neihnaah pawh a sawi lang tih an sawi bawk.
He Meeting hian heng an thurel te hi a hlawhtlin theih nan, Serchhip District chhunga harsatna tawk apiangten chawp leh chilha an phone theih tur, Magistrate Number pawh tarchhuah niin C. Lalduhzuali, MCS Ph. No. 8413058436; Vanlalhmachhuana, MCS, Ph. No. 7005321078; Denny Lalchhuanawma, MCS Ph. No. 9862359169 H. Lalhruaitluanga, MCS Ph. No. 8131852226 Samuel Zodinsanga, MCS Ph. No. 9862409765 leh District Helpline Number 6033123750-ah te biak theih reng a ni bawk.

Comments

Chhiar Hlawhte