Serchhip-a dawrkai te chhuanawm an tih thu an sawi

Serchhip District Consumers Association chuan Serchhip mipui te leh dawrkar ten Mizo nunphung dik tak an la lantir avanga chhuanawm an tih thu an sawi.

Vawiin-a thuchhuah an siamah Serchhip District Consumers Association chuan khawvel ina a buaipui mek CoronaVirus (Covid-19) avangin India ramah pawh nunphung a khaihlak tih sawiin, Serchhip khawpui ngeiah pawh mipuite pawnchhuah khap anih avangin mitin kan buai a, ei leh bar lamah kan mamawh a ngai reng bawk si avangin mipui te kan chi-ai in harsatna nasa tak kan tawk tih an sawi a. Hetihlai hian Serchhip a dawrkai tam tak chuan he harsatna denchhen hian an bungrua te tito lovin dan ang takin an hralh nia an hriat thu leh, dawrkai thenkhat phei chuan a hlawma hralh teuh teuh lovin mi tam zawk ina an chan theih nan an bungraw neih ang ang te an semzai nia an hriat thu an sawi a. Hei hi thil lawmawm tak nia an hriat thu leh, kan Mizo nunphung dik tak tlawmngaihna leh ‘Sem sem dam dam, eibil thi thi’ tih kan pipu te nundan mawi chu Serchhip dawrkai ten tun dinhmunah a taka an lantir avangin chhuanawm an tih thu leh an chungah an lawm tih an sawi a, “Chutih rualin nakin hun zelah pawh sawrkar dan zawma an bungraw neih te a MRP aia sang lo a hralh thin turin Serchhip District Consumer Association te chuan Serchhip dawrkai te kan ngen bawk a ni,” an ti bawk.