Mizoram-a National Hydrology Project leh JICA kaltlanga hmalakna thlirho a ni

Irrigation & Water Resources Minister, C. Lalrinsanga hovin Zirtawpni khan Chief Engineer’s Committee Room, I&WR Office, Aizawl-ah National Hydrology Project leh Japan International Cooperation Agency (JICA) kaltlanga Mizoram tana hmalakna hrang hrang thlirhona neih a ni.

Irrigation & Water Resources Department-a Officer te tana he hun buatsaih ah hian National Hydrology Project (NHP) kalpui nan Mizoram tan cheng vbc. 31 ruahman a nih thu leh Mizoram chu kum kal mekah hian hmarchhak-a State Implementing Agency zingah titha ber a nih thu tarlan a ni a, India ram pum state sawrkar Department zingah a titha 8-na ni tih tarlan a ni bawk. Mizoram tana ruahmanna 'Project Implementation Plan' (PlP) kalpui that avangin cheng vbc. khat dang pek belh a ni a, NHP hi kum riat chhunga thawh tur niin kum 2024 hian a tawp ang.

India sawrkar chuan ram hmasawnna tura ruahmanna te ti hlawhtling tur chuan kan Water Resources Information hriatchian chu thil pawimawh berte zing ami a ni tih hria in, National Hydrology Project (NHP) hi Ministry of Water Resources (tuna Jal Sakti) chuan a duang chhuak a. National Hydrology Project atan hian Ministry of Jal Shakti-in World Bank pawisa leh Ministry pawisa hmangin Implementing Agency hnenah 100% central funding-in a pe a. Kum 8 chhunga (2016-17 to 2023-24) zawh tura ruahman a ni.

National Hydrology Project-in a tum ber chu ram hruaituten ram hmasawnna an rel chi hrang hrangte tihlawhtling tur leh chak leh dik zawka thuthlukna an siamtheih nan rampum Lui tui neihzat (river discharges, rainfall), sik leh sa chet vel dan te tunlai thiamna sang ber hriatna leh hmanrua te hmanga rualkhai taka hriat nghal zung zungna tur chhawpchhuah leh hetiang lam khawihtu agency te tih changtlun a ni.

Mizoram tan hetianga data lakkhawmna hmanrua 'Hydromet Station' dahna tur hmun 58-ah ruahman a ni a. Heng hmanrua te hi ram-chhunga siam a nih loh avangin, hmanraw tha ber kan neih theih nan hmarchhak state, Assam tih loh zawngte 'Hydromet equipment' tur Central Water Commission (CWC) kaltlangin pek an ni dawn a. Chung data lakkhawm chu State Water Resources Information System (State WRIS) ah leh India WRIS ah a in chhungkhawm ang a, mithiamten a dik tih an finfiah hnuah a mamawh tute hman turin dah thin a ni ang.

He project hi hlawhtling taka kalpui a nih chuan Mizoramin Water Resources lamah data rintlak a nei ve tawh dawn a ni. Hei bakah hian Tuilian in mihring nunna a suat leh bungraw tihchhiatte a tlem theih nan Flood Early Warning System siam tum a ni a. A bultan nan Tlawng lui-ah he Warning System hi dah tum a ni bawk. He Project hnuaiah hian Mizorama tuikhur leh lui tui kang mek te ven dan leh tuihna tihpun dan zir a ni ang.

He hunah hian Japan International Cooperation Agency (JICA) kaltlanga Mizoram-a hmalakna pawh thlirho niin JICA hian kum 2013 leh 2015 inkar khan Development Study neiin Mizoram agriculture in hma a sawn zel theih nan 'Master Plan' a duang chhuak a. He Master Plan ah hian ei leh bara 50% aia tlem lova kan intodelh theih nan a hmalak dan tur duan a nih bakah Agriculture Sector-ah kumtin 4% tal a tan tir tum a ni.

Master Plan hi tha taka tihhlawhtlin a nih theih nan kum 5 awh tur, Technical Cooperation Project, 'The Project on Capacity Enhancement for Sustainable Agriculture and Irrigation Development in Mizoram' buatsaih a ni a. He project in a tum ber chu Mizoramin innghahna tlak Agriculture ngelnghet a neih theih nana Japan thiamna Mizoram sawrkar hnathawkte leh loneitute hnena hlanchhawn a ni a. Hmalakna tur RD Block 4 zingah Serchhip pawh a tel a ni.