Chanchin thar thenkhat

Mipuite ngenna siam

State Level Task Force on Mitigation of Coronavirus (COVID-19) chuan Covid-19 laka inven nan leh fimkhur thu hla ah mi tupawh khawsik, hritlang, khuh leh thawkna lama harsatna nei te chu School, College, Bazar, Biak In leh puipunna hmuna kal lova mahni In lamah emaw, damdawi In lamah emaw inenkawl turin leh Doctor emaw, damdawi lam mithiamte emaw rawn vat turin mipuite hnenah ngenna an siam a, hei hi ngai pawimawh a zawm tum theuh turin mitin te an ngen nghal bawk a ni.

Lunglei MJA ten tlawh
Lunglei District MJA te chuan Zirtawpni khan DIPR huaihawta SEDP hnuaia Press Project Site Visit buatsaihah Cherhlun tlawhin MiMIR Project hnuaia nizung chakna hmanga Current siam chhuahna, Solar Power Project kalpui mek leh MYC Young Achiever Award leh Lei-tlangpui Rahbi lawmman te dawngtu vawk vulh hlawhtling, H. Lalengmawia (H&T Piggery Farm) an tlawh a. Inrinni khan Hnahthial DC an kawm bakah NHIDCL hnuaia NH. 54 laih zauh mek pawh an tlawh nghal bawk.

TDS lak thin titawp dawn
State Bank of India (SBI) Regional Manager, LP. Lalchangkima chuan Inrinni khan Aijal Club-ah Central YMA hruaitute leh thuthar theh-darhtute kawmin sawrkar laipui in nikum lam atanga ti tura a tih anga State Bank of India in an hnena account nei te atanga TDS (Tax Deducted at Source) an lak thin chu an titawp tih a sawi a. He dan hnuaiah hian Tribal te chu chhiah awl tur an ni chungin lak a ni tih sawiin, YMA leh mi thahnemngai te beihna avangin tunhnai khan he thupek hi sut a nih thu leh lawmawm a tih thu a sawi a. Tribal Certificate hmangin TDS hi awl theih a nih dawn avangin SBI-a Account nei, Tribal te chu Tribal Certificate thehlut turin a chah bawk.

Police in mi 14 man tawh
Mizoram-ah Covid-19 vei hmuhchhuah an awm tawh ni anga Social Media-a thu diklo theh-darh thu-ah Mizoram Police te chuan mi 14 man tawhin thubuai siam sak an ni.

Chanchintha thlen Ni hmang
Mizoram-a Presbyterian Kohhran chuan nimin, March 15 kha Mizoram-a Chanchintha thlenna ni champha-ah hmangin he Ni pual hian chawhnu leh zan lamah inkhawm neiin thupui thlanbik hmangin thuchah ngaihthlak a ni.

Comments

Chhiar Hlawhte