UPC (NEI) Biak In khar dawn

UPC (NEI) Serchhip Pastor Bial chuan tunkar Inrinni zan atangin thu leh awm hma chuan an Bial chhunga an Biak In hrang hrangte khar nise an ti.

Mizoram sawrkar in Mizoram-a Kohhran hrang hrangte Coronavirus avanga ngenna a pek hnuah UPC (NEI) Serchhip Pastor Bial chuan nizan hmasa khan Joint Meeting neiin hemi chung-chang hi an ngaihtuah a, he hri leng mek avang hian tunkar Inrinni, March 21, 2020 zan atangin thu leh a awm hma chuan an Bial chhunga Biak In te khar ve rih phawt nise an ti a, chhungkaw tin te chu chhungkaw Maicham te siam-a Pathian biak leh tawngtai thlahdah lo turin an chah a, Thawhlawm (Sawm-a pakhat) te, Buhfaitham te leh Department thawhlawm khawn dan tur chu Tualchhung Kohhran te kut-ah dah a ni bawk. Hei bakah hian an Kohhran biak In-a Inneih tura ruahmanna lo siam tawh te chu Inneih tur ten an thulh loh chuan Biak In hawn phalsak nise an ti bawk.

Hemi hmalam hian Serchhip-a Presbyterian Kohhran hrang hrangte leh Baptist Church of Mizoram (BCM) te bakah Kohhran tenau thenkhat chuan hun engemaw chhung atan Kohhran inkhawm hrang hrangte neih loh hi an lo rel tawh bawk a ni.