MPCC in Coronavirus laka mipui himna tura Mizoram sawrkar hmalakna chu beitham an ti

Mizoram Pradesh Congress Committee (MPCC) chuan tunlai hri leng, Coronavirus (Covid-19) laka mipui kan himna tura Mizoram sawrkar hmalakna chu beitham hle nia an hriat thu an sawi.
MPCC hian nimin khan Aizawl Congress Bhavan-ah Office Bearers Meeting neiin he hri leng chungchangah hian Mizoram sawrkar in tun aia nasa zawka hma a lak loh chuan he hripui darh chak tak leh inkaichhawn awlsam tak hian Mizoram min run na hle dawn nia an ngaih thu sawiin, Corona Virus (COVID-19) hi India ram chhungah chak takin a darh mek a, state hrang hrangte pawh he hrileng laka invenna tur buaipuiin theihtawp an chhuah mek zel a, Coronavirus kai leh kai loh Test-na facility changtlung tak an nei fur tawh tih an sawi a. Mizoram sawrkar chuan Laboratory chu sawi loh, PCR Analyser takngial pawh ala nei lo chu a lungchhiatthlak hle tih sawiin, “India hmarchhak State tenau zawkte hmalakna kan umpha lo hi a vanduaithlak a, Mizoram mipui nuai 12 chuangte dinhmun hlauhawm takah min dah ni-ah kan ngai a ni,” an ti.
Hei bakah hian MPCC OB Meeting chuan Chief Minister in sum, a vaibelchhe tela a beisei loh lam atanga a dawn thu a sawi laia COVID-19 Financial Assistance ala puang ve hauhlo te chuan mipuite min ti ralkhel zual hle tih pawh sawiin, “COVID-19 darh zel laka kan him theihna tura Khum tlemte dah hran bak inpuahchahna mumal sawrkarin a neilo te hi a manganthlak kan ti a, District Hospital-ah phei chuan inpuahchahna mumal sawi tur a awm lo a ni,” an ti a. COVID-19 laka kan himna tura inpuahchahna chu zin veivak paha ngaihtuah mai mai tawkah Chief Minister hian a ngai nia a lan thu pawh sawiin, “A zinna hmun pakhatah kan Health Minister pawh a tul ang anga Finance lama a mamawh lo dap rawk rawk tura a hriattir thu a sawi a, khawvel pumpui ti chi-ai tu hripui laka sum leh paia kan inbuatsaihna tur zin veivah paha a sawi liam mai mai hi hriatthiam a harsa a, Mizo mipui thlabar taka awm mekte kan lainatawm hle-ah kan ngai,” an ti a. An Party chuan mipui punkhawm theihna ang chi an lo duan tawh leh LC leh VC inthlanna tur atana zinchhuah an lo rel chu thu leh awm hma chuan chawlh lailawk nise an tih thu an sawi bawk.

Comments

Chhiar Hlawhte