Sawrkar in nawrh khapna tichhuak

The Mizoram Essential Services Maintenance Act, 1990 bung 3(1) leh The Mizoram Essential Services Maintenance (Amendment) Act, 1995 -in thuneihna a pek angin Mizoram Governor chuan nitin mamawh bungrua (essential goods leh commodities) phurhna, sem darhna leh chhekkhawlna kawnga hnathawk te nawrh a khap.

Nawrh khapna thupek hi niminpiah (March 23, 2020) khan Home Department in a tichhuak a. He thupek chhuah hma emaw, chhuah hnu emaw-a Essential Commodities kaihhnawiha hnathawktu nuar an awm chuan dan bawhchhiatna niin dan angin hrem an ni ang. He thupek hi thla ruk (6) chhung atan hman tur a ni.

The Mizoram Essential Services Maintenance (Amendment) Act, 1995 hnuaia sub-section(b)(vii) Section 2 hian nitin mamawh bungrua leh service te chu a hrilhfiah a, chumi ang chuan Food Corporation of India te, Indian Oil Corporation te, Hindustan Oil Corporation te, Oil India Corporation Limited te leh Bharat Petroleum Limited te hi mipui mamawh tul essential services a chhiar tel an ni.