Chanchin thar thenkhat :

Tangkhang te buaipui mek

Tunhnaia India rampum-ah Lock Down kalpui a nih tak avanga Kolasib District huam-chhung a khualzin tangkhang, mahni In lama haw theilo te enkawl dan tur ngaihtuahin nimin khan Kolasib DC Conference Hall-ah Executive Zonal Magistrate leh Nodal Officer te chu District Bawrhsap, Dr. H. Lalthlangliana kaihhruaiin an thukhawm a, Kolasib DC chuan Covid-19 hri darh zel tur ven nan Lockdown puan a nih hnu a khualzin tangkhang enkawl dan tur sawrkar in a chhuah angin, Kolasib District chhunga khualzin tangkhang awm zawng zawng te chhin-chhiah a, an mamawh hrang hrang ngaihtuah sak a tul thu sawiin, hetianga hmalak dan tur hrang hrangte an sawiho bawk. Lunglei-ah pawh hetiang avanga tangkhang awm mek te hi buaipui mek an ni a, hemi atana Form siamsa hmangin hemi thehluh awlsamna atan hian ‘Village Council whatsapp group’ pawh siam a ni bawk.

Zirlai awm mek te tlawh
Mara Students’ Organisation (MSO) Joint Hqrs. Aizawl te chuan nimin khan Govt. Quarantine Centre-1, Siaha-a awm mek te tlawhin an mamawh hrang hrang leh eitur chi hrang hrang an hlan a, helai hmuna awm te zinga a tam zawk hi Mizoram pawnlam-a zirna avanga awm te an ni a, March 24 leh 25 atang khan helai hmunah hian awmin helai hmuna awm te leh anmahni enkawltute chuan lawmawm an tih thu an sawi bawk. Tun dinhmunah chuan Quarantine Centre-1 a dahte zingah insawiselna nei an awm hriat a ni lo a, Doctor ten nitin vawi 2 an tlawh ziah a ni.

PM Kissan hnuaiah sum lut
PM Kissan hnuaiah COVID-19 leng mek avanga harsatna tawk loneitute hnena pek tura Union Finance Ministry ruahmanna angin Inrinni, March ni 28 khan Mizoram chhunga hamthatna dawngtu (beneficiary) chhungkaw 16,350 te Account ah Rs. 2000/- theuh thun fel a ni ta a. Tun tuma sumfai thun zat belh khawm hi cheng vbc. 3.27 zet a ni.

Bawlhhlawh paihloh tum
Aizawl khawpui chhung bawlhhlawh paihtu, PPP Mode Bawlhhlawh Paih Welfare chuan tunlai hri leng Covid-19 vanga harsatna hrang hrang an tawh chhoh mekah he hri lêng hi kai hmasa pawl-a tang thei leh a pu darh nasa thei tur ber an ni thei nia an inhriat avangin bawlh-hlawh paih rih loh an tum a. PPP Mode Bawlh-hlawh Paih Welfare Emergency Meeting chuan bawlhhlawh paih hi Vawiin, March 30, 2020 atanga thla thar April ni 14 thleng chawlh phawt nise an ti a, mipuite chu hriatthiamna zau tak nei tura ngenin, bawlhhlawh te tha taka fun a, paih theih veleh a felfai taka paih anih theih nan lo dahkhawl turin an ngen bawk.

Pafa tui tla ruang hmuh a ni
Inrinni (March 28, 2020) chawhnu-a Tui-chang leh Tuipui infinna bul, Kham hel li-a pafa tui-a tla te chu nimin khan an ruang hmuh a ni. Inrinni chawhnu dar 3:00 vel khan Kham hel li-ah hian Hnahthial Peniel Veng-a cheng, MC. Lal-hmingliana (37) leh a fapa, Isak Rochanpuia (20) te chu an tla a, Hnahthial Peniel khawtlang chuan tui tla zawn hna hi thawk nghalin zankhua-a an zawn hnuah pawh hmu mai lovin nimin chawhma dar 10:30 vel khan an tlakna ah hian an ruang hi hmuh a ni ta a ni. MC. Lalhmingliana te pafa hi midang  2 nen chawhmeh zawng-a chhuak an ni a, an ruang hi nimin khan Postmortem a nih hnuah vuiliam nghal a ni.

Comments

Chhiar Hlawhte