I&PR Minister in Novel Coronavirus chungchang ah sawrkar thuchhuah ngaihven turin mipuite a chah

Information & Public Relation Minister, Lalruatkima chuan Novel Coranavirus chungchangah sawrkar thuchhuah ngaihvena fimkhur turin mipuite a chah.
Khamrang khaw chawm tur Solar Plant hawnna nimin zing a neih ah I&PR Minister, Lalruatkima chuan Novel Coranavirus chungchangah thuthang, belhchian dawllo leng vak a tam tih sawiin, mipuite chu chi-ai lovin sawrkar thuchhuakte ngaihven a, fimkhur turin a chah a, he natna hrik leng mek chungchangah mipuiten thuchiang an hriat a tul thu sawiin, hriattur pawimawh sawrkarin a chhuahte ngaihven thin turin a chah bawk.
Rural Development changtu Minister ni bawk, Lalruatkima chuan ram leilung, thing leh mau tichhe lo zawnga hmasawnna kalpui a tul tawh takzet tih pawh sawiin, Khamrang khawtlang hruaitute thahnem ngaihna avanga Eng chhit tur hnianghnar zawk an nei thei chu lawmawm a tih thu a sawi a. RD hmalakna hnuaia Ni 100 inhlawhna kalpui mekah tunah hian sawrkar laipuiin cheng vbc. 30 an rawn sanction leh tawh bakah cheng vbc. 40 pawh pek leh thuai an beisei tih Minister chuan a sawi a. Nikhat-a an hlawh thin Rs. 211/- pawh Minimum Wages mila kalpui turin ngen mek a ni tih sawiin, thla thar lamah chuan tihhlawhtlin theih an beisei, a ti a. PMAY Gramin mi harsa zawkte Insak tanpuina tur pawh sawrkar laipui atangin engemawzat an dawng leh dawn tih Minister hian a sawi bawk.

Comments

Chhiar Hlawhte