Latest News

Mizoram Governor hna chelh lailawk turin Brig. (Dr.) BD. Mishra (Retd.) lakluh a ni

Arunachal Pradesh State Governor ni mek Brig. (Dr.) BD. Mishra (Retd.) chu nimin tlai khan Mizoram Governor hna chelh lailawk turin rinawmna thu tiam tira lakluh a ni.

Mizoram Governor tura tunhnaia rinawmna thu tiam tira lakluh tawh Haribabu Kambhampati chu hrisellohna avanga chawlh a lak avangin India President in ruahmanna a siam angin Mizoram Governor hna lo chelh lailawk tur leh Mizoram Governor 23-na ni turin Brig. (Dr.) BD. Mishra (Retd.) hi lakluh a ni a. Chief Justice of Gauhati High Court aiawhin Justice Michael Zothankhuma, Judge, Gauhati High Court chuan rinawmna thu tiam tirin Brig. BD Mishra (Retd.) chu Governor atan a la lut a ni. Nimin-a Governor thar lakluhna inkhawm ah hian India President in Mizoram Governor atana Brig. BD. Mishra (Retd.) a rawn ruatna chu Chief Secretary Lalnunmawia Chuango chuan a chhiar chhuak a, hemi hnu hian Governor thar hi lakluh niin Upper Lawn, Raj Bhavan-ah Governor hi sawrkar mi pawimawh ten thla an lakpui nghal a ni.

COVID-19 hri leng mak avanga Aizawl khawpui huamchhungah inkhuahkhirhna kalpui a nih avangin Governor lakluhna ah hian mi tlem te chauh an tel a, Chief Minister Zoramthanga leh Deputy Chief Minister Tawnluia bakah Speaker Lalrinliana Sailo, Council of Minister te, Chief Secretary Lalnunmawia Chuaungo, DGP SBK. Singh, Political Party aiawh hruaitu pakhat theuh, NGO lian deuh te aiawh hruaite pakhat zel te chiah an tel a ni.

Mizoram Governor thar Brig. BD. Mishra (Retd.) hi July 20, 1939 khan Kathauta, Bhadohi District, United Provinces of British India (tuna Uttar Pradesh)-ah a piang a. A nupui Neelam Mishra nen fapa pakhat leh fanu pakhat an nei a ni. Amah hi lehkhatiam thei tak niin MA, Allahabad University; M.Sc, Madras University; LL.B, University of Delhi leh PhD, Jiwaji University, Gwalior atangin Degree a nei a. College of Combat, Mhow-ah kum 5 chhung Graduate leh Post Graduate te a zirtir thin a. India rama Defence College ngaihsan hlawh tak, Defence Serivices Staff College, Wellingto-ah te pawh a zirtir thin bawk a ni.

December 17, 1961 khan Sipai Officer ni tanin July 31, 1995 khan chawl a, Sipai hotu huaisen leh hlawhtling tak niin, India ram tan indona hmunah te a hmatawngah awm awm tawh thin a, Sino-Indian War, Indo-Pakistani War 1965 leh Bangladesh Liberation War-ah te khan India tan hmelma sipaite a lo hmachhawn tawh a ni. A service chhung hian Duty leh Operation pawimawh tak tak a hlen tawh a. April 24, 1993 khan NSG (Black Cats) Commander niin Raja Sansi Airfield, Amritsar-ah Indian Airlines thlawhna Terrorist ten an hijacked atangin thlawhna chuang khualzin leh a thawktu mi 124 te chu an vaia nungdamin a lo chhanchhuak tawh bawk a ni.

Comments

Chhiar Hlawhte