Health Department hnuaia hmalakna hrang hrang Health Minister hovin thlirhona neih a ni

Nimin khan Health Minister Dr. R. Lalthangliana hovin Health & Family Welfare Department hnuaia peng hrang hrangte hmalakna thlirletna neih niin he hunah hian Health Department-a Officer pawimawh te an tel a, an Department hmachhawp hrang hrangte pawh sawihona neih a ni bawk.

He thutkhawm DHME Conference Hall, Aizawl-a neih ah hian Health Minister Dr. R. Lalthangliana chuan Health Department hnuaiah hian programme chi hrang hrang chhiar fe tham kalpui a ni tih sawiin, “Heng te hi peng hrang hrangin an thawk a, kan hmalakna te kan inhriatpui tawn a tul bakah kan tanho theihna laite, hmachhawp bawhzui dan chungchangte kan sawiho hi thil pawimawh tak a ni,” a ti.

He hunah hian COVID-19 dona kawnga an hmalak dan sawiho niin VLTF leh LLTF Member te COVID-19 hri kai an awm chuan sawrkar hriatpui inenkawlna hmuna an awm man leh senso dang zawng zawng a thlawn veka pek tur an ni tih sawrkar order a awm sa thu tarlan a ni a, COVID-19 hri dona atana mamawh hmanrua, bungrua leh damdawi chi hrang hrang dinhmun a tha thawkhat tih tarlan niin, nimin khan RT-PCR test kit leh RNA Extraction kit thahnem tak a rawn thleng tih tarlan a ni a. Lockdown puan chhunga Health Department hmalakna a tha thawkhat tih tarlan niin, Mass Testing pawh Veng/Khua 65-ah neih tawh niin Sample 89,323 test zingah positive 2515 (2.81%) hmuhchhuah an ni a, Mass Test hi kalpui chhunzawm zel tur niin hri kai tlahniam zel chu inthlahdah nan hman a hlauhawm thu tarlan a ni bawk.

He huna tarlan a nih danin Food & Drugs Administration lamin Silchar atanga thlai leh theirah lo lut te a thawh hnih nan nizan atangin ramri-ah an lo endik leh dawn a, April 2020 – July 2021 inkarah damdawi dawr 1287 endikin, Dan bawhchhia licence suspend sak 3 awmin licence cancel sak 85 an awm a ni. Heng bakah hian eitur zuar leh siam thingpui dawr etc. 300 chuang an endik bawk.

Mizoram State Health Care Scheme hnuaiah kum 2020-2021 khan mi 1,13,720 an inziaklut a, COVID-19 Medical Reimbursement Bill cheng nuai 49 vel an dawng tawh bawk a. Mizoram State Cancer Institute-a Cancer hemna khawl pakhat kum 25 chuang an hman tawh chu khawl thar 3 a thlak mek a ni bawk.