Latest News

Mizoram-ah ni khat-a hri kai hmuh tlahniam zel

Mizoram-ah ni khat-a COVID-19 hri kai hmuhchhuah zat chu a tlahniam hret hret niin a lang a, niminpiah khan Sample 11,175 enfiah leh niin hri kai 487 hmuh an ni a, Sample enfiah atanga za zela 4.35 ten hri kaiin Mizoram-a hri kai hmuhchhuah erawh sing nga aiin an tam ta a ni.

Niminpiah khan ZMC-a RT-PCR Laboratory-ah Sample 1210 enfiah niin heng atang hian hri kai 523 hmuhchhuah an ni a, an vai hian Aizawl District-a Sample lak vek niin khua leh Veng 24 ami an ni a, Veng khat a hri kai hmuhchhuah tam lutuk an awmlo a ni. Fluorescent Immunoassay (FIA) Test hmangin Sample 2 enfiah niin hri kai hmuhchhuah erawh an awm lo thung.

District hrang hranga TrueNat Laboratory-ah Sample 341 enfiah ni bawkin hri kai mi 17 hmuhchhuah an ni a, an zinga mi 8 te hi Lawngtlai District ami niin Lunglei District-ah 5, Siaha District-ah 2 leh Champhai leh Hnahthial District-ah hri kai pakhat ve ve hmuh an ni bawk.

Rapid Antigen Test hmangin Sample 9622 enfiah niin heng atang hian hri kai mi 418 hmuh an ni leh bawk a, a zatve deuhthaw mi 211 te chu Aizawl District-a hri kai hmuhchhuah niin Bawngkawn-ah mi 24 zet hmuh an ni leh a, Tuikual South-ah 18 hmuhchhuah an ni bawk. A dang te hi Veng leh khua 50 atanga hri kai hmuh te an ni. Heng bakah hian Kolasib District-ah hri kai 65 hmuh niin Lawngtlai District-ah 51, Lunglei District-ah 27, Serchhip District-ah 22, Siaha District-ah 18, Champhai District-ah 13, Hnahthial District-ah 6 leh Mamit District-ah hri kai mi 5 hmuh an ni bawk.

Niminpiah khan Mizoram-ah hri kai mi 1338 te enkawl dam niin hei hi Mizoram-ah ni khat-a hri kai enkawl dam an tam ber tum a ni a, nimin khan tlai dar 5:00 thlengin hri kai 678 enkawl dam leh an ni bawk. Heti  hian nimin tlai dar 5:00 thlenga Mizoram-a hri kai hmuh tawh chu 50,437 niin heng zinga 42,697 te chu enkawl dam an ni tawh a, hei hi hri kai hmuhchhuah atangin za zela 84.65 a ni a, tunah hian hri kai enkawllai 7550 la awmin hri kai enkawllai pawh nasa takin an tlem chho tan mek a ni.

Hri kai zingah mi 190 zet an boral tawh

Nimin khan Mizoram-a COVID-19 hri kai zingah mi 4 lai boral awm lehin Mizoram-a hri kai zingah mi 190 an boral tawh a ni. Nizan hmasa zanlai pelh hnu dar 12:05 khan Thangtea (94), Vairengte chu ZMC-ah COVID-19 vangin a boral a, hemi hnu nimin zing dar 2:00 vel khan Ralthanpuii (37), Zamuang chu ZMC-ah boral ve lehin nimin zing dar 7:30 khan TC. Lalremmawii (35), Council Veng, Lawngtlai chu ZMC-ah hian a boral ve leh bawk a. Nimin chawhnu dar 1:37 khan Dongaihliana (52), Chaltlang chu ZMC-ah a boral ve leh bawk a ni.

Comments

Chhiar Hlawhte