Latest News

Vawk khuahkhirhna siam

Serchhip District-a Vawk leh Vawksa atanga thil siam lakluh khapna thupek tihchhuah leh a ni.

Hemi chungchanga Serchhip District Bawrhsap, Lalmuansanga Ralte in thupek a tihchhuah ah chuan tunlai hian Serchhip District chhunga khaw hrang hrangah Vawk natna hri, African Swine Fever (ASF) nia rinhlelh a leng mek a, he hri hi a punlun zel loh nan ramdang (foreign countries) leh State thenawm atangin Vawk, Vawksa leh Vawksa atanga thil siam reng reng lakluh khap tlat a ni a, Mizoram chhung District dang atanga Vawk lakluh leh thawnchhuah khap tlat a ni.

Serchhip District chhunga khaw dang atanga Vawk la lut turten Village Council leh YMA lehkha leh Veterinary Health Certificate, anmahni bialtu Veterinary Field Assistant (VFA) hnen atangin an nei ngei tur a ni a, Vawk talhtu ten Vawk hrisel tha chauh an talh thin tur a ni a, Vawk neituten Vawk damlo an hralh tur a ni lo tih a tarlang bawk a. He thupek hi August 18, 2021 atanga thla hnih chhung huam tur niin thupek zawm lo chu Section 188 IPC dan hmangin hrem theih an ni anga, thupek hian Sawrkar atanga phalna neite a huam lo ang.

Serchhip DVO, Dr. R. Lalmakthanga chuan thupek tihchhuah thar hi awm mah se ASF Infected Area-a Vawk talh leh zawrh chung-changa khuahkhirhna hman mek chu a ngai anga la kalpui chhunzawm tur a nih thu  a sawi.

Comments

Chhiar Hlawhte