Latest News

Mipuiin Serchhip Bazar-a dawr luhchilh

Serchhip-a mimal pakhat hnena a pung um-a pawisa dahtu nia insawi thenkhat te chuan nizan khan an pawisa dahna te dawr nia sawi chu luhchilhin bungraw lakchhuah tumin an bei a, Serchhip Police ten thil thalo lian zawk a thlen hmaa boruak thunun in hemi chungchang hi chhui zui nghal a ni.


Pawisa dahtu nia insawi te atanga thudawn danin Serchhip Tuikhuah Veng-a dawr neitu pakhat, Jenny-i tia hriat hnenah hian mi thenkhat chuan hun engemaw chen kalta atang khan a pung tam tak beisei in pawisa hi an dah thin a, amaherawh chu tunhnaiah pawisa pung chauh ni lo, an pawisa dah te pawh an lakchhuah theihloh thu sawiin, hei vang hian an dawr 'PC Store' a bungrua te hi lakchhuah tumin nizan zantir lam khan an dawr hi an luhchilh ta tih an sawi. 

He thil thleng hi hriat a nih veleh Serchhip Police te chu a hmunah kal nghalin thil duhawmlo lian zawkna thlen hmain dawr atanga bungraw lakchhuah engemaw zat chu lakkir leh a ni a, bungraw thenkhat erawh chu a bo hman nia hriat a ni. Jenny-i hnena pawisa dah nia insawi te leh Police te hi inbia in Vawiin hian an sum dah dan kimchang leh an kalpui dan te pawh hriat chian theih beisei a ni a, Police te hian an dawr bakah kudam te hi an kalh nghal bawk. Jenny-i hnena pawisa dah nia insawi te hian mi engzat chiah nge an nih pawh an hriatloh thu leh an pawisa dah zat pawh a inang lo tih an sawi a, cheng nuai 50 aia tam dah te pawh an awm nia hriat a ni.

Comments

Post a Comment

Chhiar Hlawhte