Serchhip Sports Complex-a Sports Stadium hawngin Sports Department kutah hlan nghal a ni

Urban Development & Poverty Alleviation Department (UD&PA) in Serchhip Sports Complex-a Sports Stadium an sak chu nimin khan biakhmuh theihna hmangin UD&PA changtu Deputy Chief Minister Tawnluia chuan a hawng a, he Sports Stadium hi Sports & Youth Services Department kutah hlan nghal a ni.

Aijal Club atanga Serchhip Sports Stadium hawnna hun hi Serchhip Sports Stadium-ah sawm bik mi tlemte ten an lo zawm a, he hunah hian Deputy Chief Minister, Tawnluia chuan Serchhip District mipui, he Stadium a lo din theihna tura a bulthuma thawktute, a tak taka chhawr tangkai tur infiam lama tui mite a lawmpui thu sawiin, he Stadium hi mipui ta a ni tih hriaa neitu thinlung pu theuh turin a chah a. Serchhip District thalai ten State, National leh International thleng pawha infiamnaa hming an chher theih nan an hman tangkai a beisei tih a sawi a. Serchhip District mipuite, khawtlang leh Sports lama hruaitute leh a enkawltu department ten theihtawp an chhuah hnuah a rah kan seng ta a ni, a ti.

Deputy Chief Minister chuan Sports Stadium-a Running Track phah chungchang sawiin, Lane 6 siam chu International Standard a nih thu leh tuna 5 ni mek chu siam puitling turin ruahmanna an siam thu a sawi a, hemi atana sum mamawh te pawh State Fund atangin Finance changtu Chief Minister in a duhsak a rin thu sawiin, ‘Siam puitlin hun kan nei ngei ngei ang,” a ti a. Tuna la peihfel chiahloh chungchang pawh sawiin, “A hmangtu tur thalai leh mipui ngaihtuahin a hman theih tawh si avangin hawng mai ang u kan ti a ni,” a ti a, a tira sum ruahman-a thawh tur chin chu thawh zawh a nih tawh thu a sawi bawk.

UD&PA Secretary K. Lalthawmmawia kaihhruai he hunah hian khualzahawm Sports Minister Robert Romawia Royte pawhin Ser-chhip Sports Stadium hawn a ni ta chu Mizoram mipui, a bikin Serchhip District mipuite tan ni chhinchhiahtlak leh lawmawm a ni, a ti a. UD&PA leh Sports Department thawhhona a tha hle tih sawiin, Sports Department tana tih theihloh thil tam tak tihsakin Mizoram thalai infiamna lama tui mite tan ‘change’ a thleng mek a ni, a ti a. Serchhip Sports Stadium hi a tira duan sa tidanglamin, thalaite mamawh leh awh ngawih ngawih Phullem leh Synthetic Athletic Track phah belh a ni tih sawiin, mumal leh tha taka enkawl a nih theih nan theihtawp an chhuah tur thu a sawi bawk.

Stadium hawnna hunah hian Serchhip DC mawhphurhna la mektu Lalmuansanga Ralte pawhin thu sawiin, sawrkar hmalakna ah lawmthu a sawi a, UD&PA Department-a Executive Engineer, Er. C. Malsawma chuan Technical Report a pe bawk.

Serchhip Hmar Veng Complex Field-a Football Stadium sakna tur lungphum hi 9th Oct. 2010 khan phum a ni a, thla 18 chhunga sak zawh tura tih niin a tirah NBCC hnuaiah BGM Consortium ten a sak hna hi an thawk a, amaherawh chu an hna a muan avangin anni hi tihtawp an ni a. Hemi hnu hian Agni Shanti Pvt. Ltd. te hian hna hi chhunzawmin anni hian Artificial Turf te phahin an hna hi an thawk zo a. Hemi hnu hian a tira ruahmanna a tello Running Track chu siam belh leh niin Syncotts International te chuan hei hi an thawk a ni.

Serchhip Sports Stadium hi cheng vbc. 15.25 enga sak niin sawrkar laipui atanga hmuh a ni a, a tira ruahman ah chuan Pavillion leh Gallery mi 5000 bawr vel len theihna leh Room hrang hrang te siam bakah Field Levelling leh a panna kawng siam te chu hna thawh tura ruahman a ni a, mamawhna a nasat avangin a tira Project-a tel loh Phullem (artificial turf) telh belh a ni a. He hna hi May 30, 2018 khan zawhfel a ni. Hei bakah hian a tira ruahmanna a tello cheng vbc. 3.30 senna tur Synthetic Track chu siam leh niin hei hi State sawrkar sum atanga siam a ni a, kumin April 5 khan zawhfel a ni.