Mizoram leh Meghalaya SPB Chairman ten State pahnih thawhhona tha chhunzawm zel an duh

Meghalaya State Planning Board Chairman, Lambor Malngiang chuan ni khat cham tura Mizoram rawn tlawhin nimin khan Mizoram Chief Minister leh State Planning Board Vice Chairman te kawmin, State pahnih thawhhona tha chu chhunzawm zel an duh thu an sawi.

Meghalaya State Planning Board Chairman Lambor Malngiang, MLA/MDC hian nimin khan Mizoram State Planning Board Chairman leh Chief Minister, Zoramthanga chu a Pisa-ah kawmin State pahnih thawhhona tha chu chhunzawm zel an duh thu sawi dunin, economy tihhmasawnna kaihhnawiha thu pawimawh hrang hrang te an sawi bawk. Meghalaya State Planning Board Chairman chuan Mizoram leh Meghalaya chu hman atang tawha inlaichinna tha tak lo nei tawh, Vawiin thlenga la nung reng a ni tih sawiin, Meghalaya aiawhin Mizoram chungah lawmthu a sawi a. Meghalaya a bial chhungah Mizo tam tak cheng an awm thu sawiin, thawhhona tha tak tak an neih thin thu a sawi a, hma lam pana ke kan penna ah in enhrang lovin kan inunauna a lo ngheh zel zawk a beisei thu a sawi.

He hunah hian Mizoram Chief Minister Zoramthanga pawhin Meghalaya chuan boruak muanawm zawk an neih chhoh a duhsak thu hrilhin, Meghalaya economy hmasawnna kawnga Mizoram in tangkaina a nei ve thei dawn a nih chuan theihtawp a chhuah tur thu a sawi bawk.

Lambor Malngiang hian nimin vek khan Mizoram State Planning Board Vice Chairman, H. Rammawi pawh a Pisa-ah kawmin hmalam hun atana State pahnihte thawhdunna tur chung-chang an sawidun a. H. Rammawi chuan Mizoram State Planning Board kalphung tlangpui te sawifiahin Hmarchhak State te inpumkhatna atan Mizoram leh Meghalaya in thawhdunna tha tak an nei chu lawmawm a tih thu a sawi bawk. Hemi hnu hian tlawmngai pawl hruaitute pawh a kawm nghal bawk a ni.

Mizoram tlawha rawn zin Meghalaya State Planning Board Chairman Lambhor Mal-ngiang hi Dr. Krishna Chauhan, Expert Member (Economist) Meghalaya State Planning Board leh Enrich GL. Nongbri, Law Department ten an tawiawm a ni.