COVID-19 hri kai 522 hmuhchhuah belh leh an ni

Niminpiah khan Mizoram-ah Sample 7677 enfiah atangin CO-VID-19 hri kai 522 hmuh leh an ni a, Sample enfiah atanga za zela 6.79 te chuan hri an kai a ni.

Mizoram-ah nitin hri kai hmuhchhuah la tam viau mah se hri kai hmuhchhuah erawh an tlahniam ve hret hret zel niin a lang a, niminpiah khan ZMC-a RT-PCR Laboratory-ah Sample 1083 enfiah niin heng atang hian COVID-19 hri kai 29 hmuh an ni a, an vai hian Aizawl District-a Sample lak vek niin Veng leh khua 14 ami an ni a, hri kai tawh te nen inkawmhnaihna nei vek an ni. Hei bakah hian Fluorescent Immunoassay (FIA) Test hmangin Aizawl District-ah mi 12 enfiah niin hri kai pakhat hmuhchhuah a ni bawk.

District hrang hranga TrueNat Laboratory-ah Sample 276 enfiah ni bawkin heng atang hian hri kai 21 hmuh an ni leh bawk a, an zinga mi 8 te chu Champhai District ami niin Lawngtlai District-ah hri kai mi 7 hmuh an ni a, Khawzawl District-ah 4 leh Aizawl leh Lunglei District-ah hri kai pakhat ve ve hmuh an ni bawk.

Rapid Antigen Test hmanga Sample enfiah 6306 atangin hri kai 471 hmuh an ni bawk a, an zinga mi 250 te chu Aizawl District ami te an ni. Aizawl District-a hri kai hmuhchhuah zingah hian Bethlehem Vengthlang chu Veng mal-a hri kai hmuhchhuah tamna ber niin hri kai 12 hmuh an ni a, Border Roads Organisation (BRO) mi leh sa 11 hmuh ni bawkin a bak hi Veng leh khua 46 ami te an ni a, Central Jail-a tang te atangin hri kai mi 6 hmuh leh an ni bawk. Heng bakah hian Mass Test neih atangin Tuirial Airfield-ah mi 49 leh Maubawk atangin mi 25 hmuh an ni bawk.

Rapid Antigen Test hmang hian Kolasib District-ah hri kai mi 93 hmuh niin Lawngtlai District-ah 39 hmuh a ni bawk a, Mamit District-ah mi 26, Lunglei District-ah 22, Siaha District-ah 16, Serchhip District-ah 15, Champhai District-ah 7 leh Hnahthial District-ah hri kai mi 3 hmuh an ni bawk.

Nimin khan Mizoram-ah COVID-19 hri kai mi 860 te chu enkawl dam leh an ni bawk a, heti hian nimin tlai dar 5:00 thlenga Mizoram a hri kai hmuhchhuah chu 50,959 niin an zinga 44,005 te chu enkawl dam an ni tawh a, hei hi hri kai hmuhchhuah atanga chhutin za zela 86.35 niin tunah hian hri kai enkawllai 6762 an la awm mek a ni.

Mizoram-a hri kai zingah mi 2 boral leh

Nimin khan Mizoram-a COVID-19 hri kai zingah mi pahnih an boral leh a, nimin zing dar 6:30 khan Nisungi (83), Lawngtlai Vengpui chu Lawngtlai DCHC-ah a boral a, hemi hnu nimin zing dar 7:22 khan Santi Rabidas (78), Chanmari West Aizawl chu COVID-19 vangin ZMC-ah a boral ve leh bawk a ni. Heti hian nimin tlai thleng khan Mizoram-a hri kai zingah mi 192 an boral ta a ni.