Chanchin thar thenkhat :

Kawng siam dan tur sawiho

Chief Minister Zoramthanga hovin nimin khan PWD hotute leh NHIDCL hotute chu CM Office Cabinet Meeting Room-ah Aizawl khawpui leh a chhehvela kawng siam hmalakna thar chung-chang sawiin an thukhawm a. He hunah hian Sairang-a Rel kawng lo lut tur leh lirthei la pung zel tur thlirlawkin, Aizawl khawchhung a tawt belhchhah loh nan by-pass Road siam theih dan remchang a awm em tih te an sawiho a ni. He hunah hian Adviser to CM (Technical) Er. K. Sawmvela, Addl. Chief Secretary JC. Ram-thanga, Engineer-in-Chief Er. Lalmuankima Henry leh Mizoram PWD hotu dangte leh NHIDCL hotute an tel a ni.

ICT Minister in tlangzarh

Mipui ten Mobile Phone hmanga awlsam taka Two Wheeler Taxi an koh theihna tura Ai-zawl Two Wheeler Taxi Association (ATTA) buatsaih, HUIVA Mobile Application chu nimin khan Information & Communications Technology (ICT) Minister Robert Romawia Royte chuan Aizawl Press Club-ah a tlangzarh a. He hunah hian ICT Minister chuan Two Wheeler Taxi khalhtute chu rinawm tak leh dik taka hna thawk tura fuihin khawvel hmasawnna mila mipui tana awlsamna tura hma an la chu chhinchhiah tlak leh lawmawm a tih thu a sawi bawk. Huiva Mobile Application hi Playstore atanga download leh install theih a ni.

Lei dawh hna zofel tep

Kaladan Multi Modal Transit Transport Project hnuaia Lawngtlai atanga Myanmar ram pawh tur kawngpui sial mekah Lei (Bridge) dawh tur pariat (8) zinga Lei pahnih tihloh chu hna thawh tur zaa 70 zawhfel a ni tawh a, Ruankhum Lei chu Lei in Pile Foundation mamawh a nih vangin Revised Estimate ah telh niin hna tan a la ni lova, Zocha Lei chu 30% zawh tawh niin, Ngengpui Lei leh Hmawngbu Lei chu 70% zawh tawh niin, a bak Lei pali Bawklawk, Lunghauka, Khawrawp leh Zochate Lei te chu 80% zawhfel tawh bawk.

Assembly Bial ruak-ah puang

Tuirial bialtu MLA Andrew H. Thangliana chu August 17, 2021 zing dar 6:35-a a boral tak avangin 4-Tuirial Assembly Constituency (ST) chu MLA luahtu awm lovin a ruak a ni tih Mizo-ram Legislative Assembly Secretariat-a Commissioner & Secretary, H. Lalrinawma chuan a puang a, sawrkar Dan awmsa angin thla ruk (6) chhungin bye-election neih tur a ni dawn a ni.