Latest News

CBNAAT khawl hawn a ni

Nimin khan Serchhip District Hospital-ah TB enfiahna khawl thar, Catridge Based Nucleic Acid Amplification Test (CBNAAT) chu hman theih tura hawn a ni.


National TB Control Prog-ramme hnuaia CBNAAT khawl bun thar hi Serchhip CMO, Dr. Laldawngliana Sailo chuan Serchhip District Hospital OPD Building-ah a hawng a, hetianga awlsam zawka TB hri kai hmuh-chhuahna theihna tur khawl Serchhip-a bun thar a ni ve ta chu lawmawm a tih thu a sawi bawk.

Serchhip District TB Officer Dr. Lalnun-hlima Khiangte kaihhruai he hunah hian District Medical Superintendent Dr. ZD. Lalmuanawma pawhin thu sawiin, he hunah hian Serchhip District Hospital-a Doctor te leh TB enkawlna lama thawktute an tel a ni.

CBNAAT khawl hmang hian a rualin Sample pali (4) test theih niin, darkar 2 chhungin result kimchang a pe thei a, a hmalama Sputum Microscopy hmanga Sample enfiah thin ah TB kai hmuchhuak tura 1ml Sputum-ah a hrik 5000 tal a awm a ngai thin chu tlemte chauh a awm pawhin CBNAAT khawl hmang hi chuan hmuh theih a ni tawh dawn a, hei mai bakah hian TB dam har chi, MDR-TB an nih leh nih loh enfiah tura hmunpui zawka Sample thawn ngai thin te pawh tunah hian he khawl hmang hian hmuh theih a ni tawh dawn a ni. Tuna CBNAAT Lab. hawn tak hi TB hrik enfiahna tur bika ruahman niin State thenkhatah chuan TB mai nilo, COVID-19 leh natna dang dang chi 15 chuang en nan an hmang a ni.

He huna tarlan a nih danin kumin chhung hian Sputum Microscopy hmangin Serchhip District-ah Sample 142 enfiah niin TB hrik kai 8 hmuhchhuah an ni a, CBNAAT Falkawn-ah Sample thawn 103 awm tawhin hri kai mi 9 hmuh an ni a, an zingah hian MDR TB mi 2 an awm a. Kumin chhung hian Serchhip District-ah TB hrik kai mi 57 enkawl ni tawhin tunah hian hri kai enkawllai 33 an la awm mek bawk a ni.

Comments

Chhiar Hlawhte