Pathianni-ah hri kai 292 hmuh belh leh an ni

Pathianni khan Mizoram-ah Sample 2093 enfiah niin heng atang hian COVID-19 hri kai 292 hmuhchhuah an ni a, Sample enfiah atanga za zela 13.95 laiin hri an kai a ni.

Pathianni khan ZMC-a RT-PCR Laboratory-ah Sample enfiah awm lovin Fluorescent Immunoassay (FIA) Test hmangin Sample enfiah a awm lo bawk a, Siaha leh Mamit District-a TrueNat Laboratory-ah Sample 41 enfiah niin heng atang hian hri kai mi 12 hmuh an ni a, an vai hian Siaha District ami te niin Siaha khawchhunga hri kai hmuhchhuah vek an ni.

Mizoram District 11 zinga District 8-ah Pathianni khan Rapid Antigen Test hmangin Sample 2052 enfiah niin heng atang hian hri kai mi 280 hmuhchhuah an ni a, an zinga 169 te chu Aizawl District-a hri kai hmuhchhuah an ni. Aizawl District-a hri kai hmuhchhuah zingah hian Bungkawn chu Veng mal-a hri kai hmuh tamna ber niin hri kai mi 17 hmuh an ni a, Bethlehem Vengthlang-ah 13 leh Bawngkawn-ah 12 hmuh an ni bawk a, a bak zawng hi Veng leh khua 51 ami an ni.

Heng bakah hian Siaha District-ah hri kai mi 47 hmuh an ni a, Mamit District-ah pawh hri kai 32 hmuh niin Chuhvel khua ah hri kai mi 11 hmuhchhuah an awm a, Kolasib District-ah hri kai mi 15 hmuh niin Lawngtlai District-ah 7, Lunglei District-ah 5, Serchhip District-ah 3 leh Champhai District-ah hri kai mi 2 hmuh an ni bawk.

Nimin khan tlai dar 5:00 thlengin Mizoram-ah hri kai mi 385 te enkawl dam an ni leh bawk a, heti hian nimin tlai dar 5:00 thleng khan Mizoram-a hri kai hmuhchhuah chu 52,472 an ni tawh a, heng zinga 46,675 te chu enkawl dam ni tawhin hei hi hri kai hmuchhuah atangin za zela 88.95 a ni a, tunah hian hri kai enkawllai 5597 an awm mek a ni.

Mizoram-a COVID-19 hri kai boral 200 an tling ta :

Mizoram-ah COVID-19 hri kai enkawl dam pung zel mah se hri kai zingah mi 200 zet an boral tawh thung. Pathianni zan dar 8:30 khan Baby Chakma (13), Jamersury (Lawngtlai District) chu COVID-19 vangin ZMC-ah a boral a, nimin zing dar 1:15 khan Lalthanmawii (50), Maubawk chu ZMC-ah boral ve leh bawkin nimin zing dar 6:00 khan Lalengkima (36), Kawnpui chu ZMC-ah bawk a boral ve leh a ni.