Khawzawl DC in NH. 6 laitute a kawm

Khawzawl District Bawrhsap C.C. Lalchhuangkima chuan nimin khan Khawzawl District huamchhunga National Highway No. 6 kawng laih hna thawktu NHIDCL Contractor-te chu an hna thawh tawh chin leh harsatna an neih te a sawipui.

Khawzawl DC Conference Hall-a thutkhawm ah hian Khawzawl DC chuan National Highway No. 6 chu Khawzawl District leh Mizoram tan kawngpui pawimawh tak a nih avangin hna tha leh chhenfakawm hnutchhiah tur leh, a hun taka zo thei tura hma la turin a chah a. Puih an ngaihna-a pui turin District Administration chu a inpeih reng tih a hrilh a. Corporate Social Responsibility (CSR) kaltlanga an luanchhuah tawhnaah lawmthu sawiin, mipui leh khawtlang tana thiltha leh tangkai hnutchhiah tura luangchhuak zel turin a sawm nghal bawk.

Khawzawl District chhunga NH-6 kawng laih hna hi package pali-ah then niin, Contractor pali ten an thawk mek a. Seling to Dulte Package IV, KM 17.160-a thui chu Anusha Projects Pvt. Ltd. in thawkin, tunah hian hna za zela 41.69 (41.69%) zawh tawh a ni a, Contract Agreement-a inziak aia hunbi hma zelah an hnathawh a kal mek a ni. Dulte to Champhai (Package -I), KM 17.950 a thui laih hna chu Dhariwal Buildtech Ltd. in kumin June thla tawp atangin an thawk tan a, nakum December ni 24-a zawh hman tura ruahman niin, tunah hian hna zawng zawng atanga chhuta za zela 5.17 (5.17%) an thawk zo tawh a ni. Heng bakah hian Dulte to Champhai (Package -II), KM 12.450-a thui chu M/S Dwarkamai Construction Pvt. Ltd. in an thawk tan tawh a. Dulte to Champhai (Package- III), KM 26.780-a thui chu Shri Balaji Construction Company in June 25 atanga thawk tanin, tunah hian za zela 1.84 (1.84%) thawh zawh tawh a ni bawk.