Zirna In sang zawk hawn leh dan tur sawiho a ni

Mizoram chhunga College leh zirna In sang zawkte hawn leh dan tur chungchang sawihona chu nimin khan Higher & Technical Education Minister Dr. R. Lalthangliana hovin a Pisa-ah neih a ni.

He sawihona kaihruaitu H&TE Minister Dr. R. Lalthangliana chuan COVID-19 hripui leng vangin hun rei tak regular class neih a ni tawh lova, heti chung hian zirlaite an khaihlak loh nan ruahmanna hrang hrang siam a ni tih sawiin, Online Class leh thil chi hrang hrang kalpuiin Degree Course Examination pawh hlawhtling taka kan buatsaih chu a lawmawm takzet tih a sawi a. India ram University leh College tam zawkin an tih theih loh kan ti hi zirlaite hmakhaw ngai tak chunga thawktute inpekna vang a ni, tiin “COVID-19 hripui leng zel karah kan dinhmunte uluk taka thlir chungin zirna In hawn a, regular class kalpui a theih tawh mai ang em? tih hi kan ngaihtuah a tul a ni,” a ti.

He thutkhawm a tel te hian India ram State hrang hranga College leh University te kal dan an thlirho a, Mizoram-ah pawh College leh Institute thenkhat hmunhma te chu CCC atana hman a la nih thute sawi a ni a, zau taka an sawiho hnuah September thla laihawl vel atangin Aizawl Municipal Corporation (AMC) area pawn lamah Offline Class/Regular Class kalpui turin zirna In hawng tura ruahmanna siam phawt tha an ti a, State Executive Committee on Mizoram State Disaster Management Authority in an ngaihtuah tura thlen nise an ti a. Heng ruahmanna an siam hi COVID-19 boruak thlir reng chungin a tul anga ngaihtuah that leh theih tura tih a ni. Mizoram University hotute pawhin class tan chungchangah hian Mizoram sawrkar thupek ang ang an zawm theih tur thu he hunah hian an sawi a ni.