Chanchin thar thenkhat :

Hri leng dona hmanrua hlan

India Formosa Foundation leh Tzu Chi Foundation, Taiwan tangkawp chuan Mizoram sawrkar in COVID-19 hripui leng a dona kawnga a hman turin PPE Kit 10,000; N-95 Mask 10,000 leh Face Shield 10000 chu nimin khan Health Minister Dr. R. Lalthangliana hnenah an hlan a. He hunah hian Jonathan Lalremruata, India-Formosa Foundation Chairman chuan COVID-19 hripui leng vanga harsatna tawk Mizoram District hrang hranga chhungkua 20,000 te tanpui turin hma an la mek tih sawiin, tunah hian chhungkua 16,000 vel tanpuina hi pek an nih tawh thu leh chhungkaw 4000 vel pe leh tura an inruahman mek thu a sawi a, Bitcoin Foundation, USA kal-tlangin Oxygen Concentrator leh Ventilator thahnem tak an chah mek thu a sawi bawk.

FMGE&W in chhunglut leh

Mizoram sawrkar hnathawk inzawmkhawm pawl lian ber, Federation of Mizoram Govt. Employees & Workers te chuan COVID-19 hri leng avanga harsatna tawkte puihna tura an Member te sum thawhkhawm kal zelah nimin khan a tum thumna atan Chief Minister's Relief Fund for COVID-19 ah Rs. 70,61,600/- chu chhunglutin Chief Minister hnenah an hlan a. FMGE&W hian June 17 khan cheng vbc. 3 leh July 12-ah cheng vbc. 2 chhunglut tawhin tuna an chhunluh leh nen hian a vaiin Rs. 5,70,61,600 an chhunglut ta a ni.

 FMGE&W chuan ram in hun harsa tak a tawh lai a thawhlawm thawh theia an awm chu lawmawm an tih thu he hunah hian a sawi a ni.

Online Training buatsaih

High School leh Higher Secondary School Mathematics Zirtirtute tan Online Class kal-tlanga zirna kalpui dan tur zirhona chu tunkar Thawhlehni leh Nilaini zan khan neih a ni a, Zirtirtu 351 telin zirtirtu thawklai ten an sikul lama tunlai thiamna hmanga zirtirna an kalpui dan pholanna an nei a. Software man nei lo chi leh device hman dan awlsam chi hrang hrang te, Content siam te, Youtube-a thil upload dan te, online hmanga zirtirna pek kaihhnawih chi hrang hrangte inhrilhhriat a ni. He programme hi hman tangkai chhunzawm zel a nih theihna turin Human Resources Development Board, Youtube Channel-ah dah a ni.

SGPB thutkhawm neih a ni

Kumtin-a neih thin, State Geological Programming Board (SGPB) thutkhawm vawi 26-na chu nimin khan SAW Conference Hall, Aizawl ah neih a ni a, he hunah hian Directorate of Geology & Mineral Resources leh Mizoram sawrkar hnuaia Line Department hrang hrang- AMC, PWD, PHE, P&E, UD&PA, Minor Irrigation, DC office zawng zawng te leh Disaster Management & Rehabilitation Department bakah Mizoram chhunga Central Agencies awmte- Geological Survey of India (GSI Tripura-Mizo-ram Circle), Central Water Commission (CWC), BRTF, ONGC, Oil India Ltd. te hnathawh chu thlirho niin Agenda 13 lutte chu sawiho a pawm a ni a. Aizawl DC Dr. Lalhriatzuali IAS chuan Directorate of Geology & Mineral Resources Annual Report 2020-2021 a tlangzarh nghal bawk.