Latest News

Chanchin thar thenkhat :

Oil Palm-a hmalakna duhlo

Conservation Mizoram chuan nimin khan thuchhuah siamin Prime Minister in tun thla ni 8 a Twitter kaltlanga thu a tihchhuah ah Central sawrkarin Oil Palm chinna tharthawh leh tura hmalakna ah India hmarchhak te a tinzawn hle tih a lang tih tarlangin, tun thla ni 19-a Chief Minister Zoramthanga’n Twitter hmang vek a hemi chungchanga lawmthu sawina a siam chu pawi an tih thu an tarlang a, “Kan ram biodiversity tichhe thei sumchang thlai chinna tura hmalakna hi kalpui lo turin kan ngen tak meuh a ni,” an ti. Hei bakah hian Oil Palm chinna atana ramngaw zau tak tak thiah a ni thin te, Oil Palm in khuarel sik leh sa a tihdanglam nasat dan te enchung leh mithiamte thuziak tam takin Oil Palm in khuarel a tih khawloh nasat ziate hre reng chungin Conservation Mizoram chuan Oil Palm chinna tharthawh leh tura hmalakna chu an duhlo tih sawiin, chhun-zawm lo turin sawrkar pawh an ngen tih an thu-chhuah ah chuan an tarlang bawk.


Sadbhavana Diwas hmang

India Prime Minister boral ta Rajiv Gandhi piancham August ni 20-chu sawrkar chawlh a nih avangin amah hriatrengna pualin Sadbhavana Diwas chu nimin khan Mizoram Sawrkar Office hrang hrangah hman a ni a. Civil Secretariat hnathawk te chuan Secretariat tual-ah hun hmangin JC.Ramthanga, Addl. Chief Secretary kaihhruaina hnuaiah hnam hrang hrangte, Sakhaw hrang leh Tawng hrang hrang te inkara inpum-khatna leh inremna atana thawk turin thutiam an chham rual a ni.


CM chawimawina hlan

Vairengte Joint VC hruaitute leh All NGO aiawhte chuan nimin khan Chief Minister Zoram-thanga chu a Pisa-ah hmuin Ramri chungchanga hma a laknaah Chief Minister chungah lawmthu sawiin, chawimawina puan, Iptepui leh Khumbeu te an hlan. He hunah hian Joint VC leh All NGO aiawhte hi Serlui bialtu MLA Lalrinsanga Ralte chuan a ho a ni.


Congress atangin ZPM zawm

Mizoram Pradesh Congress Committee (MP-CC)-a hruaitu chanvo pawimawh tak tak lo chelh tawh David M. Thangliana chuan nimin khan Congress atanga banna a thehlut a, nimin vek khan ZPM Party a zawm nghal bawk. David M. Thang-liana hi tunhnaia MLA boralta Andrew H. Thangliana pa (a papuia) niin Tuirial bial bye-election a ding thei tura rin zingah a tel mek bawk a ni.

Comments

Chhiar Hlawhte